Principia la campaña de matriculación en llingua asturiana

Publicado 13/06/2018 18:10:14CET
- GOBIERNU D'ASTURIES.

UVIÉU, 13 Jun. (EUROPA PRESS) -

Esti xueves principia la campaña de matriculación en 'Llingua asturiana y Lliteratura' pal cursu académicu 2018-2019. Ente esti xueves 14 y hasta'l 22 de xunu, los escolinos de Primaria van poder formalizar la matricula, mentes que pa ESO y Bachilleratu la matricula va tar abierta del 2 al 13 de xunetu.

La campaña, como ye vezu, tien el títulu de #YoApúntome y busca informar a escolinos y families de la posibilidá de matriculase en llingua asturiana --o gallego-asturianu na zona Occidental--, amás d'informar de les ventayes de deprender la llingua propia.

"El conocimientu de llingua asturiana ayuda a tener un repertoriu fonolóxicu más ricu y con más posibilidaes sintáctiques, y polo tanto una mayor competencia en comunicación llingüística y meyores habilidaes pa la resolución de problemes, conocimientu del mediu o dominiu de los conceptos espacio-temporales", indiquen dende la Conseyería d'Educación y Cultura.

Amás, destaquen la importancia de deprender asturianu pal multillingüismu, porque "saber asturianu ye mui beneficioso pa deprender otros idiomes y va avéranos a llingües romániques como l'italianu, el gallegu, el portugués o'l francés".

Otra manera, tamién se fala na campaña de que conocer l'asturianu permite conocer les espresiones culturales qu'utilicen esti idioma. "La riqueza d'una llingua refléxase na so lliteratura. Conocer l'asturianu ye abrir una puerta a la so lliteratura, al universu de les sos creaciones, al descubrimientu de mundos nuevos, d'otres formes de cuntar y de pensar", señalen.