Profesoráu d'asturianu reclama la reconocencia de la especialidá docente nuna concentración n'Uviéu

   UVIÉU, 19 May. (EUROPA PRESS) -

   Esti martes docentes de Llingua Asturiana y Gallego-asturiano concentráronse delantre de la Delegación del Gobiernu, acompañaos por docentes d'otres especialidaes, families, organizaciones de reivindicación llingüística, sindicatos y representantes políticos, pa siguir reclamando al Ministeriu d'Educación el reconocimientu de la so especialidá docente y una solución urxente a la situación de discriminación llaboral que sufre esti colectivu.

   "Pasaron yá casi dos meses dende la concentración celebrada en Madrid, na que'l profesoráu treslladó directamente al Ministeriu la necesidá de poner fin a una situación inxusta que s'allarga dende hai décades. Sicasí, hasta güei, nada cambió. La Conseyería d'Educación continúa esperando una xunta cola ministra mientres el Ministeriu asegura tar estudiando xurídicamente esta cuestión", recuerden dende ADAE.

   El colectivu reconoz que'l procesu ta en marcha, pero esixe celeridá. "Los drechos llaborales del profesoráu d'asturianu y gallego-asturiano nun puen siguir esperando más. Cada cursu que pasa ensin una solución perpetúa una situación d'abusu ya inseguridá llaboral inalmisible", señalen.

   Durante la concentración, el profesoráu volvió encadenase simbólicamente, una imaxe que reflexa con claridá la realidá que vive'l colectivu: "Ye la propia alministración la que caltién encadenaos a cientos de docentes a una interinidá perpetua al quita-yos d'acceder a un procesu d'oposición qu'esiste pal restu d'especialidaes docentes".

   Según recuerden, l'asignatura esiste, el profesoráu ta plenamente formáu y capacitáu y más de 30.000 alumnos y alumnes cursen anguaño Llingua Asturiana y Gallego-asturiano n'Asturies. "Nun falten nin alumnáu, nin docentes, nin voluntá social: falta namás la voluntá política pa facer les modificaciones llexislatives necesaries que permitan acabar con esta anomalía".

   El profesoráu concentráu quixo dexar claro que nun va abandonar esta reivindicación hasta llograr una solución definitiva. "La igualdá de drechos nun puede siguir aplazándose".