"La 'llingua' son 'los bables' y 'los bables' son la 'llingua', más allá d'enriedos miqueros", indicaron
UVIÉU, 3 Dic. (EUROPA PRESS) -
Una docena de profesores de la Universidá d'Uviéu suscribieron un manifiestu nel qu'espliquen que "científicamente" nun ye posible negar la existencia del asturianu nin del gallego-asturianu, polo que nel debate sobre la reforma del Estatutu reclamaron "una esixencia mínima de rigor a los sos actores" a pesar de "la llexitimidá de los distintos puntos de vista".
El manifiestu, firmáu por profesores de los departamentos de Filoloxía Española y Filoloxía Clásica y Románica de la Universidá d'Uviéu, afirma que nel debate sobre la oficialidá "toles postures son respetables na midida na que sían igualmente respetuoses y constructives".
Con too, indicaron que "nuna comunidá que se quier plural y discrepante, la concordia cimiéntase na ellaboración colectiva d'un discursu inclusivu articuláu dende la conocencia científica y la crítica racional".
Asina, reclamaron a los medios de comunicación "nun dar sitiu a falsedaes y bulos" que foron "desacreditados nel estáu actual de la conocencia científica" y solicitaron nun confundir "la confrontación ideolóxica llexítima sobre la oficialidá con una discursión bizantina sobre conceptos namás filolóxicos".
Amás, insistieron en que "nun hai llingües superiores o con más dignidá qu'otres", polo que pidieron "el más escrupulosu respetu" y nun reemplazar les opiniones d'espertos "por cualesquier firmante con ínfules" que llega al "absurdu" de negar la existencia del asturianu o la so unidá.
"La 'llingua' son 'los bables' y 'los bables' son la 'llingua', más allá d'enriedos miqueros", señalaron, pa indicar que l'usu plural de 'bables' ye "una impostación ideolóxica de recién" que resulta "insólita nel ámbitu románicu y dexa de llau cualquier fundamentu históricu razonable".
Asina, indicaron que nenguna llingua ta "obligada a un confinamientu nel usu domésticu", que la normativa del asturianu "foi mayoritariamente adoptada polos que voluntariamente apuesten güei pol esti idioma nel rexistru escritu" y calificaron como "infame" vincular a los asturianofalantes con nacionalismu.
El manifiestu ta firmáu por Xulio Viejo Fernández, Ramón d'Andrés Díaz, Xuan Carlos Busto Cortina, Fernándo Álvarez-Balbuena García, Miguel Rodríguez Monteavaro, Alfredo Álvarez Menéndez, Juan Carlos Villaverde Amieva, Taresa Fernández Lorences, Álvaro Arias Cabal, Raquel Suárez Fernández, Pablo Roza Candás y Ramiro Javier Barcia López.
