La promoción del asturianu mantiénse nel 0,04% del total del presupuestu y supón el 4% de les partíes de Cultura

Berta Piñán y Adrián Barbón.
PRINCIPADO. - Archivo
Publicado: jueves, 5 diciembre 2019 14:38

UVIÉU, 5 Dic. (EUROPA PRESS) -

La partida pa promoción del asturianu recoyida nel proyectu de presupuestos pa 2020 xube a 1.904.630 euros, lo que supón --al igual que nes cuentes del 2019-- el 0,04% del total de les cuentes autonómiques. Otra manera, la cifra ye'l 4% de tol presupuestu de la Conseyería Cultura, Política Llingüística y Turismu.

Nes cuentes vixentes --pactaes ente PSOE, Podemos Asturies y IX-- la promoción del asturianu yera de 1.703.630 euros, polo que'l presupuestu de política llingüística pal 2020 xube en 201.000 euros. Sicasí, al producise una medría xeneral del presupuestu autonómicu, la partida continúa representando'l 0,04% del total de les cuentes.

Ente elles repítese la partida de 70.000 euros a RTPA pa la promoción del asturianu y hai una nueva de 14.400 pa que la Universidá d'Uviéu ponga en marcha un serviciu de normalización llingüística.

Tamién va haber subvenciones a los servicios de normalización de la Comarca de la Sidra, Cabu Peñes, Avilés, Siero, Mieres, Llangréu, L.lena, Cangas, Samartín del Rei Aurelio, Corvera, Llaviana, Castrillón, Llanera, Grau-Candamu, A Veiga, Ribeseya y el Parque Históricu del Navia.

Per otru llau, l'Academia de la Llingua Asturiana va tener --si salen alantre los presupuestos-- 220.000 euros. Otra manera, hai partíes p'actividaes culturales, promoción del asturianu nos medios y la promoción del llibru, onde tamién hai una partida de 10.000 euros pa que les biblioteques públiques merquen llibros n'asturianu o gallego-asturianu.

Otra manera, tamién s'inclúi la convocatoria de los cinco premios lliterarios, el Premiu Nel Amaro de teatru profesional y el Premiu al Meyor Cantar, amás de elaboración y xestión de les convocatories de les pruebes de certificación correspondiente a los niveles de competencias en lengua asturiana.

Nos presupuestos recuéyese amás la necesidá de que los oxetivos de promoción y normalización social se cumplan "pola importancia histórica y cultural tanto de la llingua asturiana como del gallego-asturianu".

En xeneral, Cultura, Política Llingüística y Turismu va cuntar con 47 millones y ente les sos principales actuaciones pa 2020 ta la promoción del Xacobeo y l'adecuación de los caminos a Santiago d'Asturies, invirtiendo na "puesta a puntu" de los mesmos, ameyorando la so accesibilidá y seguridá y la promoción turística. Esta Conseyería ye una de les que menos presupuestu tien, namás supera por Facienda, que ye la única Conseyería qu'amenorga'l so presupuestu y que va cuntar en 2020 con 36 millones pa la so actividá.

Asturianu ofrecido por