Actualizado 27/01/2009 21:27 CET

La propuesta d'especialidaes de Maxisteriu dexa fuera Asturianu y Educación Musical

UVIÉU, 27 de Xineru (EUROPA PRESS)

La Xunta de la Facultá de Maxisteriu va votar el próximu xueves la propuesta definitiva de menciones cualificadores, ye dicir, les especialidaes que, tres la reforma d'estos estudios pa la so adautación al espaciu européu, van poder cursar los estudiantes de la diplomatura d'Educación Primaria. La mesma consta de seis disciplines, ente les que nun tán nin Llingua Asturiana nin Educación Musical.

Concretamente, la propuesta que se va someter a votación inclúi seis meciones: Llingua Española, Matemátiques, Conocimientu del Mediu, Educación Física, Educación Especial y Educación Artística. Nun s'inclúi poro la especialidá d'Educación Musical, que nesti momentu cuenta con una diplomatura propia dientro de la escuela.

Per otra parte, la creación d'un mención de Llingua Asturiana, que se propunxere pol Seminariu de Filoloxía Asturiana de la Facultá de Filoloxía, descartóse, según esplicó la directora de la Escuela, Gloria López Téllez, nuna primer votación. Téllez matizó que los estudios d'asturianu "van incluyise próximamente", pero como "asignatures optatives, y non como una mención".

Nesti momentu, existen asignatures optatives d'asturianu en maxisteriu, si bien los diplomaos maestros que quieran optar a dar clase de 'Llingua' nos colexos, tienen de facer el cursu de posgráu de 'Espertu en Llingua Asturiana' organizáu pola Facultá de Filoloxía.

La propuesta del Seminariu yera la creación d'una mención de llingau que sustituyere como titulación reglada al cursu de 'Espertu', igual que nel casu de Filoloxía, el Minor de Llingua Asturiana va sustituyir al de 'Especialista', exixíu pa los filólogos.

Per esti tema, la Xunta pola Defensa de la Llingua anunció güei la convocatoria d'una concentración el xueves a les 11.30 (media hora enantes del conceyu de la Xunta) ante la Escuela de Maxisteriu, "en protesta pola votación que se quier llevar alantre, na que la direición del centru pretende que l'asturianu quede fuera de los estudios reglaos, incumpliendo con ello tolos mandaos llegales que piden espresamente una titulación na carrera".

La reforma de Maxisteriu establez el caltenimientu de dos titulaciones, Infantil y Primaria. Dientro d'esta última, van poder cursase les futures menciones cualificadores qu'agora se deben decidir. En casu d'aprobase la propuesta, la Xunta de la Facultá va entamar los trabayos d'ellaboración de los planes d'estudios concretos pa cada especialidá.

Asturianu ofrecido por