Publicado 16/09/2021 15:27CET

La propuesta d'oficialidá presentada pol Principáu toma como base l'Estatutu gallegu

Archivo - Junta General del Principado de Asturias
EUROPA PRESS - Archivo

UVIÉU, 16 Sep. (EUROPA PRESS) -

El Gobiernu asturianu ta presentando a los distintos grupos parllamentarios una llista colos once aspectos que consideren esenciales pa tratar nel procesu de reforma del Estatutu. Ente ellos ta la oficialidá del asturianu, con un tratamientu asemeyáu pal gallego-asturianu --recoyíu, eso sí, col nome de 'eo-naviegu'-- pero nel so "esclusivu ámbitu territorial".

Pa la redacción del artículu cuatro nuevu del Estatutu propunxeron a los grupos tomar como base'l correspondiente artículu del Estatutu d'Autonomía de Galicia, porque recueye la necesidá d'aprobar una Llei de Normalización, que va ser onde se desenvuelva'l modelu d'oficialidá d'Asturies. L'artículu cuatro actual yá recueye que va ser una llei de la Xunta Xeneral la que determine la protección, usu y promoción del asturianu.

La propuesta de la reforma impulsada pol Executivu tamién pretende la disolución anticipada de la Xunta Xeneral ensin tener que coincidir les elecciones autonómiques con calter obligatoriu nel mes de mayu de cada cuatro años.

Per otru llau, va recoyese que la capital rexonal ye la ciudá d'Uviéu y tamién proponen que'l Estatutu tenga, a diferencia del actual, un preámbulu pa "reforciar la nuestra institucionalidá" y "dar razón de los cambios nos que se concreta la reforma".

Amás, pretenden reordenar l'articuláu del testu pa que sía "más harmónicu y coherente" y introducir la posibilidá de que'l Conseyu de Gobiernu pueda aprobar disposiciones con rangu de llei supeditaes a la posterior convalidación parllamentaria.

Recoyer les competencies del Gobiernu en funciones y regular les rellaciones ente la Xunta Xeneral y l'Executivu, amás d'incorporar competencies nueves, son otres de les cuestiones de les que partió la negociación.

Asturianu ofrecido por