Actualizado 06/11/2013 13:28

Próspero Morán señala'l "fracasu" nel usu de la Televisión Autonómica como mediu d'articulación de la sociedá asturiana


UVIÉU, 06 de Payares (EUROPA PRESS)

El periodista y investigador Próspero Morán destacó esti martes, na so intervención nel Xornaes Internacionales d'Estudiu de l'Academia de la Llingua Asturiana la "oportunidá perdida" n'Asturies a la hora d'utilizar el proyectu de radiotelevisión autonómica como mediu d'articulación social, tanto pola tardanza en ponela en marcha, como pola falta de producción propia y poles sos carencies na penetración nes redes sociales.

Señaló na so intervención trés oportunidaes perdíes, siendo la primer d'elles na década de los 80, pola renuncia del PSOE, al formular a finales de 1986 una propuesta alternativa pa les comunidaes nes que tenía mayoría pa la puesta en marcha d'una especie de Tercer Canal Federada, de la que formaríen parte Asturies, Extremadura, Castilla-La Mancha y Murcia.

La segunda renuncia foi nesti sieglu, cola aprobación de la llei qu'establecía los porcentaxes d'inversión de les televisiones na creación audiovisual. Asina, recuerda que nel casu de la TPA, nun siendo'l "fracasu de la coproducción de la serie de ficción 'El Faro', dafechamente criticada dende delles asociaciones sociales y culturales, nun hai conocencia de producciones de ficción cinematográfica nestos años caberos, nin tan siquier nel ambitu de les series o películes pa televisión". "L'arrenunciu ye dafechamente visible tamién al desistir de convertir la llingua asturiana na vehicular de la programación dende l'entamu de les emisiones de la TPA", apunta Morán.

Citó nesti puntu a Miguel Angel Casado del Río, que dexa claro que "pensar qu'una televisión autonómica pue ser una ferramienta d'espardimientu de la cultura y de la identidá rexonal ensin cuntar cola producción de ficción ye un error".

La tercer y definitiva renuncia llega, según Morán, cola incorporación d'internet y les redes sociales a les televisiones autonómiques. "La RTPA nun tien malpenes presencia nes redes sociales como entidá nin los sos informativos de forma específica. Nun cunten con canal de YouTube, nin perfil o páxina en Facebook. En 2011 yeren, con Murcia, la única Televisión autonómica sin presencia nes redes sociales y eso que cásique'l 7% de les visites a la so páxina web veníen de Facebook. La TPA incluyera una aplicación en iOS pal iPhone pero escaeciose d'Android, resalvando'l mayor volume d'audiencia del Principáu nesti sistema operativu pa móviles que tien a disposición de los falantes d'asturianu bien de ferramientes gratuites como'l Diccionariu de l'Alla", critica Próspero Morán.

LLINGÜES ROMANCES

Nesti primer día de les Xoranes, tamién intervinó'l profesor Seteven Dworkin, de la Universidá de Michigan, que faló sobre 'La estabilidá y continuidá léxica del hispanu romance'. Afondó sobre la pervivencia na llingua española, na portuguesa, y tamién n'otres como l'asturiana, de términos como 'tomar' o 'matar', que se perdieron n'otres llingües d'orixe románicu, frente a otres palabres como 'venir', que sobreviven na xeneralidá del entornu románicu.

Según esplicó, el carácter aisláu de los territorios de la península ibérica, con respecto al restu del imperiu romanu, favoreció la evolución diferente dende'l llatín, asina como la pervivencia d'estes palabres.

Asturianu ofrecido por