UVIÉU, 12 Sep. (EUROPA PRESS) -
La Comisión llexislativa de Cultura, Política Llingüística y Turismu de la Xunta Xeneral va tar presidida por Lidia Fernández (PSOE), mentes que Reyes Fernández Hurlé (PP) va presidir la d'Educación.
Les Comisiones Permanentes Llexislatives y non Llexislatives de la Xunta Xeneral quedaron constituyíes esti miércoles, 11 de setiembre, depués de les sesiones de constitución presidíes pol presidente del parllamentu autonómicu, Marcelino Marcos Líndez.
Según indiquen dende la Cámara, los 19 diputaos y diputaes qu'integren caúna de les Comisiones escoyeron, al traviés de votación n'urna, a los que van ocupar les presidencies de les Meses de cada Comisión.
No que se tien que ver coles Comisiones Llexislatives, la del área d'Infraestructures, Mediu Ambiente y Cambiu Climáticu va tener como presidente a Luis Ramón Fernández Huerga, diputáu del PSOE; la de Presidencia va tener como presidenta a Ángela Vallina (IX); y la de Facienda a Beatriz Polledo (PP).
Coles mesmes, la Comisión d'Industria, Empléu y Promoción Económica va ser presidida por Mónica Ronderos (PSOE); la d'Educación por Reyes Fernández Hurlé (PP); la de Salú por Daniel Ripa (Podemos); la de Derechos Sociales y Bienestar por Cristina Vega Morán (PP); y la de Desarrollu Rural, Agroganadería y Pesca por Ricardo Suárez (PSOE).
La Comisión de Cultura, Política Llingüística y Turismu va tar presidida por Lidia Fernández (PSOE); y la de Ciencia, Innovación y Universidá va tener como presidenta a Susana Fernández Álvarez (Ciudadanos).
Amás, la Comisión de Pidimientos y Derechos Fundamentales va tener como presidente de la Mesa a Adrián Pumares, diputáu de Foru Asturies; mentes que la Comisión de Control de Radiotelevisión del Principáu d'Asturies va tar presidida por Esther Freile (PSOE).
P'acabar, foi constituyida la Diputación Permanente, con presidencia pa la Mesa de la Xunta, encabezada pol Presidente, Marcelino Marcos Líndez, y que ta formada por 19 diputaos y diputaes.
