Publicado 09/02/2016 20:29CET

La puntuación de la llingua en procesos selectivos namás ta pensada pa la futura Oficina de Normalización

UVIÉU, 9 Feb. (EUROPA PRESS) -

La propuesta de puntuación de la conocencia de la llingua asturiana nos procesos selectivos pa trabayar nel Conceyu d'Uviéu namás ta pensada de primeres pa cubrir los puestos de la futura Oficina de Normalización Llingüística que'l tripartitu municipal tien previsto entamar.

Asina lo esclaró en declaraciones a Europa Press el conceyal d'Interior, Personal y Contratación, Iván Álvarez (Izquierda Unida), qu'inclúi la propuesta nuna llista de seis midíes pa fomentar l'usu y la dignificación de la llingua asturiana dientro de la so área de Gobiernu. El conceyal de Cultural, y compañeru de partíu d'Álvarez, Roberto Sánchez Ramos, defendía ayeri la puntuación n'oposiciones de conocencia d'asturianu pa favorecer la oficialidá de la llingua.

La propuesta d'Álvarez plantega "valorar la llingua asturiana nel ámbitu d'oposiciones cuando les funciones del puestu lo requieran", n'alusión a los futuros trabayadores de la Oficina de Normalización Llingüística, y, en casu de que se crearen nel futuru, a otros puestos que tuvieren dalgún tipu de vinculación cola llingua asturiana. "Nun va pidise asturianu pa ser delliniante o operariu de llimpieza", matizó Álvarez.

Recordó amás que tolos conceyos que cuenten con serviciu de normalización llingüística piden conocencia d'asturianu pa ocupar esta plaza, "como nun pue ser d'otra manera".

La propuesta de midíes tamién inclúi la rotulación n'asturianu lo mesmo de delles dependencies municipales como de vehículos y maquinaria del Conceyu o de les empreses subcontrataes. Nesti casu aplicaríase a vehículos y equipos que se vayan incorporando pa nun xenerar gastu añadíu.

Otra midida ye la facilitación de cursos de llingua asturiana a los trabayadores municipales, tanto funcionarios como personal llaboral, y recuperar la toponimia tradicional nos mapes y planos del Conceyu, puesto que la so cartera de Gobiernu tamién inclúi la formación y la estadística.

Álvarez pretende d'esta dir "dando pasos" na so área de xestión en favor de la normalización de la llingua asturiana nel Conceyu d'Uviéu, un aspectu nel que'l Consistoriu lleva "munchos años de retrasu". Defendió, sicasí, qu'ésta ye una cuestión "bien tresversal", y que debe desarrollase en collaboración con otros ámbitos del Gobiernu municipal.

Asturianu ofrecido por