UVIÉU, 4 Feb. (EUROPA PRESS) -
El rector de la Universidá d'Uviéu, Santiago García Granda, defendió esti llunes la continuidá del so equipu rectoral depués de les elecciones d'anguaño, pa impulsar midíes qu'ameyoren la vida de "tolos" colectivos universitarios.
Ve García Granda "dientro de la normalidá" qu'aparezan contrincantes pal Rectoráu. Nunes declaraciones a los medios momentos enantes de la inauguración d'una placa n'homenaxe al catedráticu Fernando Pendás Fernández, que morrió n'avientu de 2018, el rector aseguró que ye "lóxico" que nun procesu asina salgan a la lluz "descontentos" que se sumen "a otros proyectos interesantes". "Hai que confrontalos y caún defender el que tien", dixo.
Cree'l rector de que'l proyectu actual "funciona", anque precisa de "más tiempu" pa rematalu. "Cuatro años nun ye abondo, anque creo que nestos cuatro años camudaron munches coses", añadió.
L'oxetivu del so equipu, esplicó, ye que los estudiantes tengan "más medios", que salgan meyor formaos y que puedan acceder a les carreres "que realmente-yos presten". "Hai qu'incidir más na información previa a los estudiantes", dixo, pa evitar el fracasu escolar, amás de "lluchar" p'ameyorar la posición de la Universidá d'Uviéu nel ranking de Shanghai y desaniciar cualquier tipu de precariedá del profesoráu.
