UVIÉU, 22 Oct. (EUROPA PRESS) -
La obra 'Seltegu', del dibuxante Ruma Barbero foi la ganadora de la decimoprimer edición del Premiu Alfonso Iglesias de Cómic en llingua asturiana. El premiu, convocáu y concedíu pola Conseyería de Cultura, Política Llingüística y Turismu del Gobiernu d'Asturies, tien una dotación de 5.000 euros.
El xuráu encargáu de valorar les obres, aconceyáu baxo la presidencia del director xeneral de Política Llingüística, Antón García Fernández, tuvo formáu polos autores de cómic y ilustradores Raquel Lagartos Ibáñez y Anxelu González Fernández, ganador de la edición pasada, amás de la ilustradora Sonia García Sánchez.
Ente les obres presentaes, el xuráu decidió conceder el premiu al cómic tituláu 'Seltegu', destacando, como consta n'acta, que se trata de "una obra autobiográfica mui plástica y bien compuesta que domina los recursos narrativos del xéneru". El testu presentóse col seudónimu Hariri.
Rumaldo Antón Barbero de Diego, Ruma Barbero, ye llicenciáu en Belles Artes y como autor de cómic tien ganao yá dos veces el premiu Alfonso Iglesias, poles obres 'Manzajú' (2009) y 'El viaxe a la lluz' (2015). Amás d'estos dos títulos, les sos últimes publicaciones nesta estaya n'asturianu son 'Aguantando cachones 2' (2016), 'Gaspar a tiempu completu' (2019) y 'Les 7 maraviyes de Xixón' (2019). Amás de la so faceta como autor de cómic, ye tamién diseñador y maquetador de llibros y discos, amás de miembru del grupu folk Felpeyu y lletrista pa munches formaciones asturianes.
