UVIÉU, 6 Ago. (EUROPA PRESS) -
La Conseyería de Salú confirmó esti xueves 32 casos positivos nuevos de coronavirus, trece rellacionaos colos brotos declaraos en Llanes y nun chigre de Xixón.
El brotu de los establecimientos de La Terraza de Laura y la escuela de surf Skull, en Llanes, suma 17 afectaos, en detectándose 11 contaxos nuevos. Per otru llau, dos positivos nuevos xuben a 23 el númberu de persones afectaes del chigre xixonés La Buena Vida.
Amás, confírmase un brotu na residencia Residencia Villamil-Serantes, en Tapia, pol positivu d'ún de los usuarios. Esta tarde van realizar pruebes PCR a tolos residentes y trabayadores. Amás, adoptáronse les midíes de prevención y protección afayadices pa protexer a esti colectivu, como la suspensión de visites y paseos, ente otres.
Per otru llau, otros 10 positivos computaos son contactos estrechos de casos conocíos, que yá taben n'aislamientu.
El Serviciu de Vixilancia Epidemiolóxica ta estudiando otros ocho casos correspondientes a les árees sanitaries I (Xarrio), IV (Uviéu) y V (Xixón) pa establecer el so vínculu epidemiolóxicu.
Los contaxaos presenten síntomes leves y permanecen n'aislamientu nes sos cases.
