Actualizado 03/11/2009 20:31 CET

Sánchez Miret cree que l'estudiu de la diptongación asturiana ta influenciáu pol discursu de Menéndez Pidal

UVIÉU, 03 de Payares (EUROPA PRESS)

El profesor de la Universidá de Salamanca, Fernándo Sánchez Miret, consideró güei que l'estudiu de la evolución de la diptongación n'asturllionés ante les formes yod y wau, que dieron palabres como 'mieu' o 'güei' ta condicionada pola presencia del castellanu como llingua mayoritaria y el discursu de Ramón Menéndez Pidal nel debate llingua-dialectu en 1906.

El profesor espresóse asina demientres la so intervención nes Xornaes d'Estudiu de la Llingua Asturiana, qu'organiza l'Academia de la Llingua na Facultá de Filoloxía.

Sánchez Miret discrepó de les teoríes sobre la evolución d'esta diptongación: "nun ta clara la evolución, nun se sabe cómo llegamos a esi resultáu". "La interpretación tradicional averaría una evolución a otres llingües como l'occitanu o l'aragonés, pero igual nun ye la interpretación más adecuada, y sería un fenómenu asemeyáu al castellán, con influencies del asturianu-lleonés".

Pa Miret, "hai coses que nun tán clares, porque paez ser que nos testos antiguos ye un poco difícil ver si había diptongación o non de verdá d'unes vocales, les que dieron 'ie' 'ue' o 'uo', nun lo tenemos bien estudiáu, hai qu'estudialos meyor".

Asina, exemplificó con formes como 'güei' o 'mieu' o 'miou'. "Eses formes esplíquense diciendo qu'hubo una diptongación provocada por unos soníos que diben dempués". Pero la so teoría ye que "esto nun ta tan claro. Igual nun hubo esa diptongación provocada por soníos detrás de les vocales. Esto".

Dende'l so puntu de vista, "si nun existiere'l castellán, l'hermanu que comió (otres lligües) en tol territoriu, igual esos fenómenos veríemoslos d'otra manera, pero tola investigación tuvo condicionada polo que Menéndez Pidal dixo sobre l'asturianu lleonés en 1906 y había que replantegase esa visión antigua".

Asturianu ofrecido por