XIXÓN, 20 May. (EUROPA PRESS) -
El presidente del Gobiernu en funciones y líder del PSOE, Pedro Sánchez, comprometióse esti llunes a desarrollar la llexislatura "de les oportunidaes pa los mozos", con iniciatives como la d'ufiertar el mayor parque públicu de viviendes n'arriendu y en propiedá pa los mozos.
Pero para poder facer realidá esti proyectu y otros vinculaos al impulsu de la educación pública, Sánchez necesita de conceyos gobernaos polos socialistes que dexen suelu públicu pa esti parque de viviendes o p'abrir centros d'educación públicos.
Y esto ye asina porque España ye un país fondamente descentralizáu, que comparte soberaníes y competencies, señaló nun mitin énte 3.000 persones nel pabellón central de la Feria de Muestres p'arropar a los candidatos del PSOE a la Presidencia del Principáu d'Asturies, Adrián Barbón, y a l'alcaldía de Xixón, Ana González.
Sánchez, que tamién fixo campaña en Xixón pa les xenerales, pidió "nun dexar a medies la xera" del 28 d'abril y que se vuelva a votar de manera mayoritaria al PSOE nos comicios municipales, autonómicos y europeos del 26 de mayu.
Y ye que les meyores qu'él quier pa España nos cuatro años próximos nun van ser "tan atayantes" si'l PSOE nun gobierna tamién en conceyos y Comunidaes Autónomes, alvirtió.
Sánchez defendió que'l PSOE ye l'únicu partíu que tien un proyectu nacional pa tolos territorios del país, énte unes dereches col únicu proyectu de la supervivencia de los sos líderes.
"Van colos de la feria y vuelven colos del mercáu", dixo --en castellanu-- parafrasiando un dichu popular asturianu que s'usa pa definir a aquellos que, pa quedar bien con tol mundu, dícen-y a unos y otros lo qu'esperen escuchar.
