Publicado 30/03/2019 11:33CET

La Selmana de les Lletres Asturianes va tar dedicada a la música asturiana de los últimos 40 años

Candás acueye una xornada de baille tradicional n'apoyu a la oficialidá
LLORÍAN GARCÍA. - Archivo

UVIÉU, 30 Mar. (EUROPA PRESS) -

La 40 edición de la Selmana de les Lletres Asturianes va tar dedicada a la música asturiana de los últimos 40 años. El Principáu considera que'l llabor de los profesionales de la música en favor de la normalización llingüística "ye un fechu que merez reconocencia institucional y popular".

Dende'l 26 d'abril al 9 de mayu van entamase delles actividaes repartíes per tola comunidá, como talleres, esposiciones, homenaxes, presentaciones de llibros, llectures públiques, certames y concursos lliterarios, alcuentros escolares, entregues de premios, conciertos o representaciones teatrales, informaron dende'l Gobiernu esti sábadu al traviés de nota de prensa.

L'actu inaugural de la Selmana, l'Alba de les Lletres Asturianes, va celebrase'l 26 d'abril, a les siete de la mañana, na escuela de Llorgozana (Carreño). Esi mesmu día, a les 20.00 hores, nel Teatru Nuevu de La Felguera (Llangréu), va celebrase la gala del XI Premiu al Meyor Cantar.

Nes feches siguientes, los conceyos de Ribeseya, Siero, Uviéu, Corvera, Grau, Xixón, Avilés y Tapia van acoyer delles actividaes. Nel Día del Llibru Asturianu, el 4 de mayu, los que merquen llibros o discos n'asturianu o gallego-asturianu van recibir de regalu un doble CD con una selección de 40 cantares representativos de la historia de la música nestes llingües.

La Conseyería d'Educación y Cultura rinde anguaño tributu a la música y a les lletres asturianes descentralizando la organización y el desarrollu de los actos, en collaboración con instituciones y entidaes como la Xunta Xeneral, l'Institutu Asturianu de la Muyer y Polítiques de Mocedá, la Fundación Aula de les Metáfores, Llaboral Ciudá de la Cultura y dellos conceyos.