Publicado 30/06/2016 14:41CET

El Seminariu de Filoloxía presenta'l llibru 'Manuel Menéndez y l'Asturies Occidental'

Pela izquierda, Gómez, García y Viejo, mientres  la presentación.
Europa Press

UVIÉU, 30 de Xunu (EUROPA PRESS)

El Grupu d'Investigación del Seminariu de Filoloxía Asturiana presentó esti emiércoles el llibru 'Manuel Menéndez y l'Asturies occidental', acabante publicar pola editorial Trabe, y dedicáu al dialectólogu, etnógrafu y arqueólogu Manuel Menéndez García (1909-1962), autor de la célebre tesis doctoral 'El Cuartu de los Valles, un habla del occidente asturiano' (1963, 1965).

L'actu presidiólu'l rector de la Universidá d'Uviéu, Santiago García Granda, el decanu de la Facultá de Filosofía y Lletres, José Antonio Gómez Rodríguez, y el profesor ya investigador Xulio Viejo Fernández.

El llibru cuenta con aportaciones de Xulio Viejo Fernández y Ramón d'Andrés sobre l'asturianu occidental y la frontera ente asturianu y gallegu. Andrés Menéndez Blanco escribe sobre la toponimia y l'arqueoloxía na Asturies occidental. Jose Avelino Gutiérrez González, Patricia Suárez Manjón y Jesús Ignacio Jiménez Chaparro analicen l'arqueoloxía del valle del Esva nos trabayos de Manuel Menéndez y María Josefa Sanz Fuentes refiérense a la recuperación del fondu documental del monesteriu d'Obona. Pela so parte, Adolfo García Martínez fala de la familia del Cuartu de los Valles, "troncalidá, patrillocalidá y mayoralgu".

Con esti volume, complétase l'homenaxe que'l Seminariu y el Real Institutu d'Estudios Asturianos ficieron n'ochobre del 2014 al recordáu estudiosu de Tinéu. Les sesiones d'aquella cita celebráronse nel Departamentu de Filoloxía Española (Campus d'El Milán, Uviéu) y nel Salón d'Actos del Ridea (Pza. Porlier, Uviéu). Presentáronse entós dos llibros inéditos del llingüista homenaxáu: 'Toponimia, refranes y conjuros' y 'Palabras y cosas de Bermiego'.

L'actu d'ayeri valió tamién pa la presentación del númberu 15 de la revista Filoloxía Asturiana, y del llibru 'Patrimoniu Oral d'Asturies', que recueye les intervenciones del congresu internacional 'El patrimoniu oral d'Asturies: balance y perspectives', celebráu na Facultá de Filoloxía nel 2009 y promovíu pol Seminariu.

Nél inclúyense aportaciones sobre'l romanceru, el refraneru y el cancioneru asturianos, el corpus asturianu d'oraciones, salmos y conxuros, o'l patrimoniu oral etnográficu, ente otros estudios.

Asturianu ofrecido por