UVIÉU, 11 Oct. (EUROPA PRESS) -
Los integrantes del Conseyu Regulador de la Sidra d'Asturies caltuvieron una xunta esti vienres col conseyeru de Desarrollu Rural, Agroganadería y Pesca, Alejandro Calvo pa tratar la situación del sector. Enantes de principiar l'alcuentru y en declaraciones a los medios, los representantes de la DOP esperaron que la d'anguaño va ser una collecha bona de mazana, tan bona como la 'cosechona' de hai dos años pero "mas equilibrada".
Y ye que según la vicepresidenta del conseyu y cosechera, Belén García, ye una collecha bona y "más curtia que la d'hai dos años, por dellos motivos, per un llau pol resultáu bonu de los tratamientos pal control de la vecería y per otru pol clima d'anguaño, más secu qu'otros".
Polo tanto indicó que les estimaciones indiquen que va haber un equilibriu bonu ente ufierta y demanda, lo que ye "bien interesante pal sector". García indicó que lo van plantear al conseyeru pal sector ye siguir pel camín que van porque "les coses pa la DOP van abondo bien".
"La DOP sigue medrando y eso ye fundamental pa los cosecheros", indicó García, qu'al igual que'l conseyeru del ramu, indicó que más allá de la imaxe lo importante ye centrase na calidá del productu y el trabayu tien que ser pa caltener y ameyorar esa calidá.
BOTELLA DE SIDRA
Nesti sentíu, y preguntáu pola sentencia que da la razón a un productor cántabru, considerando que la botella de sidra nun tien nada diferenciador pa que se utilice n'esclusiva pa la sidra asturiana, el conseyeru indicó que "más allá d'esa imaxe lo que tien de primar ye la calidá".
"Nós apoyamos al sector en toles iniciatives de defensa del productu, pero hai que respetar el marcu llegal. Lo que si diximos ye que'l trabayu qu'hai que facer ye que la principal diferenciación del productu sía la calidá, como asina lo ye", dixo Calvo.
Calvo recordó la importancia de la marca sidra d'Asturies y lo que la mesma supón pa la rexón. Indicó que se sigue trabayando pa llograr que la mesma sía reconocida como Patrimoniu Inmaterial de la Humanidá, pero manifestó qu'esi trabayu ye "al mediu plazu" y nun pue falase d'una fecha concreta.
