Actualizado 12/03/2008 14:54 CET

Los sindicatos ganaderos van tentar de frenar la importación de lleche y derivaos si la industria baxa precios

UVIÉU, 12 de Marzu (EUROPA PRESS)

Los tres principales sindicatos agrarios y ganaderos asturianos, Unión de Campesinos Asturianos (UCA), Asociación de Xóvenes Agricultores (Asaxa) y Coordinadora d'Organizaciones d'Agricultores y Ganaderos (COAG), amenazaron güei con torgar les importaciones llecheres y productos derivaos dende l'estranxeru, si la industria del sector caltién la so intención de baxar los precios que paga pola lleche a los productores.

Asina lo anunciaron güei los tres sindicatos nuna rueda prensa conxunta, presentada por Geli González, secretaria xeneral d'Asaxa, y na que tamién tuvieron presentes los secretarios xenerales de COAG, Óscar Sirgo, y d'UCA, José Calvo, amás del responsable del sector llechero d'esta última organización, Balbino García. L'alcuentru colo medios prodúxose tres un conceyu de les tres centrales p'algamar una posición conxunta frente a l'anunciada baxada de precios de les industries llecheres.

"Nun vamos permitir que nengún llitru de lleche d'otru país llegue al so puntu de destín, si se realiza otra baxada de precios", aseguró González. A entrugues de los periodistes sobre los métodos a emplegar pa tal fin, la vocera sindical llendóse a repetir que van "procurar que les importaciones nun lleguen al so puntu de destín".

Asina pues, los sindicatos va aconceyase mañana colos ganaderos pa preparar una campaña de movilizaciones, col oxetu de torgar "por tolos medios" l'anunciada baxada de precios.

Los tres sindicatos tienen claro, según Geli González, que "el preciu actual ye'l xustu". El mesmu ta asitiáu en 50 céntimos, que ye la cantidá aproximada que les empreses paguen a los ganaderos por cada llitru de lleche. Según cálculos de José Calvo, tres entrevistase con una empresa de contabilidá d'esplotaciones ganaderes, "pagando'l llitru de lleche a un preciu de 70 pesetes de les d'enantes (42 céntimos), el marxe de beneficiu ye cero".

Por esti motivu, González dexó claro que los 50 céntimos actuales "ye la cantidá mínima pa garantizar la viabilidá de les esplotaciones; y l'únicu preciu establecíu confirme a los costes de producción", los cuales recordó qu'aumentaron, no que se refier a preciu de cereales, piensos, combustible, plásticos y demás gastos de les ganaderíes. "Una nueva baxada diba facer peligrar les esplotaciones; si ya abandonaron munchos na última reducción, otra baxada pue conllevar otru importante númberu d'abandonos", añadió.

INDUSTRIA RESPONSABLE.

Los sindicatos culpen del actual aumentu del preciu de venta al públicu de la lleche a les empreses y a les distribuidores. "Los ganaderos cobren 50 céntimos por llitru de lleche, y tol mundu sabe que'l preciu págase nos supermercaos ye muncho mayor", esplicó Calvo. Entiende que "hai un marxe mui importante pa les industries y les distribuidores, que ante llibremente pol mercáu, y llueu se mos quier facer responsables a los ganaderos del aumentu de precios", matizó.

González quiso dexar claro nesti sen que "los ganaderos nun son culpables del aumentu de los costes nel mercáu al públicu".

Acusó amás a les distribuidores de non realizar práctiques mui llegales "cuando tán vendiendo productos de marques blanques de la propia distribución a un preciu mui inferior al que venden les marques de lleche". "Pensamos que se tán utilizando la lleche y los productos llecheres como un productu ganchu de les grandes superficies", afirmó.

Anunció amás la intención de los ganaderos d'exixir a l'Alministración que s'investigue "si se tán produciendo práctiques de 'dumping' tanto na lleche como los productos derivaos".

Pa José Calvo, "los ganaderos, d'una vez por toes, vamos tentar, y pienso que vamos llogralo, que non sólo se mos use pa imaxe publicitaria". "Les industries tienen que tener mui caro que mos negamos a ser imaxe publicitaria; cuando se fai publicidá marques de lleche, se mos usa a los paisanos, a los praos verdes, etc. y llueu impórtense grandes cantidaes de lleche de fuera d'Asturies y d'España. Llegó'l momentu de que nun lo permitamos", finó.

Asturianu ofrecido por