UVIÉU, 12 Dic. (EUROPA PRESS) -
El Grupu Municipal Somos Uviéu presentó esti xueves delles enmiendes al que calificaron como "el peor presupuestu de la historia d'Uviéu".Una d'elles busca la restitución de la plaza de coordinador del Serviciu de Normalización Llingüística.
"Un presupuestu que recurtiu en beques escolares y empléu, xube impuestos y tases a les families uvieines mentes perdona'l recargu nel recibu del IBI a les grandes fortunes, escaez les necesidaes de los barrios y pueblos d'Uviéu nel capítulu d'inversiones, y vuelve la política de amiguetes: subvenciones nominatives al Centru Asturianu y a empresarios amigos y xubida xeneralizada de sueldos", detalló la portavoz de Somos, Ana Taboada, en rueda de prensa.
Dende Somos insistieron que se trata de "un presupuestu de recortes y hachaes" y llamentaron que'l mecanismu d'enmiendes parciales llinde'l marxe d'actuación de la oposición. Consideren que'l bipartitu tendría que modificar el capítulu d'ingresos qu'inclúi'l IBI diferenciáu.
Nel capítulu d'inversiones, Somos reclamó la inclusión nel presupuestu de los grandes proyectos de la ciudá como'l Bulevar de Santuyano o la Fábrica de Gas, y reivindicaciones vecinales como'l centru social d'El Cristu, el centru de salú de La Manxoya, el polideportivu de Trubia, el zarru del colexu Poeta Ángel González o la sienda a Cualloto.
El conceyal Rubén Rosón, tamién presente na rueda de prensa d'esti xueves, pidió la retirada de la subvención nominativa al Centru Asturianu y que esos 50.000 euros repártanse ente tolos clubes deportivos uvieinos.
Per otru llau, Anabel Santiago esplicó qu'ente les enmiendes presentaes pola so formación inclúyese la reposición de financiación a festivales y congresos que crecieren col gobiernu anterior y que desaparecen col bipartitu, como son 'Oviclip', 'Otero Brutal Fest' y 'Cometcon'.
Santiago trató tamién la supresión de les ayudes a la llingua asturiana; llamenta qu'amás de suprimir la partida económica destinada a l'Academia de la Llingua Asturiana sumen a ello la de la figura del coordinador d'asturianu pa la creación d'una plaza d'inxenieru industrial.
L'anteproyectu de presupuestos de la Fundación Municipal de Cultura contemplaba una ayuda de 24.000 euros. Somos solicita la restitución de la plaza de coordinador yá que entienden que "un Conceyu como'l d'Uviéu nun puede discriminar d'esta forma la llingua asturiana".
