UVIÉU, 25 Sep. (EUROPA PRESS) -
La conseyera d'Educación del Principáu d'Asturies, Carmen Suárez, defendió esti vienres na Xunta Xeneral la xestión del so departamentu y el compromisu de la comunidá educativa pa tratar d'asegurar "el derechu a la educación de calidá a pesar del andanciu".
Na so comparecencia na Comisión d'Educación, a propuesta de Podemos, la conseyera refirióse al empiezu del cursu escolar y la organización de l'actividá lectiva pa remarcar que "cualquier planificación tien que ser capaz d'afacese a la evolución del andanciu".
Suárez señaló que la incidencia del coronavirus n'Asturies ta perbaxo de la media nacional y que s'ellaboraron estratexes pa encarar esta situación esceicional con flexibilidá. Rebaxar les ratios a 20 alumnos por aula y la contratación de más personal, la realización de pruebes PCR a tol profesoráu, amás de l'alquisición d'equipos informáticos, tán ente les midíes de la Conseyería pa esti cursu académicu, según apuntó la titular d'Educación.
"Esti cursu esixe esfuerciu, rigor y responsabilidá de toos", dixo la conseyera, añadiendo qu'Asturies ta yá na "segunda fola", polo que pidió la collaboración del restu de formaciones, tamién na negociación presupuestaria. Sicasí, la oposición foi crítica cola xestión educativa del Principáu.
