LES ARRIONDES, 23 Ene. (EUROPA PRESS) -
El director-xerente del Serviciu de Salú del Principáu d'Asturies (Sespa), José Ramón Riera Velasco, compareció esti miércoles nel Conceyu de Parres pa confirmar la evacuación de pacientes del Hospital del Oriente d'Asturies (HOA) por precaución pola situación ríu Seya al so pasu per Les Arriondes.
Al alcuentru asistieron l'alcalde de Parres, el socialista Emilio Longo, el xerente de la área sanitaria VI - que cubre los conceyos del oriente- José Manuel Llera y l'arquitectu del Principáu, Jesús Menéndez. Toos mandaron un mensaxe de tranquilidá, asegurando que se taba trabayando de "forma perbién coordinada" con Bomberos, Policía Local y Guardia Civil pa evitar situaciones como les rexistraes en xunu de 2010, cuando los usuarios tuvieron que salir del HOA en llanches.
Dende la xerencia del área sanitaria VI confirmaron que'l protocolu d'emerxencia activárase anueche al comprobar que la velocidá y nivel crecíen ensin control. A les 2.30 hores de la mañana desallugóse la planta -1, un procesu que llevó alredor de dos hores y nel que participaron los trabayadores del turnu de nueche.
Ellí tán, ente otros servicios, la farmacia y los almacenes amás del área d'hemodiálisis, con preseos qu'allugaron nes plantes cimeres por seguridá. Entós había hospitalizaos 70 pacientes, de los qu'a 31 dióse-yos esta mañana l'alta al considerar que'l so estáu nun revistía gravedá.
El restu d'usuarios treslladáronlos n'ambulancia, de forma gradual (y acompañaos de los sos respectivos informes clínicos), al hospital d'Avilés (11 a medicina interna y 4 a neumoloxía), 10 a medicina interna del hospital de Xove, 4 a traumatoloxía del Naranco, otros tantos a la mesma especialidá en Cabueñes y el restu recibieron atención del serviciu de obstetricia nel Hospital Universitariu Central d'Asturies (HUCA).
Amás paralizóse hasta avisu nuevu l'actividá asistencial y suspendiéronse cinco ciruxíes programaes en Les Arriondes. Les autoridaes nun s'atreven a dar una fecha de cuándo va poder restablecese con normalidá l'asistencia. El puntu críticu va vivise a les 18.14 hores d'esta tarde, cola pleamar. Hasta'l puestu de mandu avanzáu treslladóse'l conseyeru de Presidencia y Participación Ciudadana, Guillermo Martínez, que reconoció que la situación "ye complicada".
Martínez numberó hasta 166 incidentes dende l'empiezu de l'activación del plan d'emerxencia, qu'obligó a cerrar cuatro centros educativos, ente ellos l'institutu y el colexu de Les Arriondes pero tamién el de Noreña y Llaviana. "Hai qu'esperar la evolución de la previsión meteorolóxica que s'espera mala, con precipitaciones de 80 llitros per metru cuadráu nes 24 hores próximes", sostién.
