UVIÉU, 4 Nov. (EUROPA PRESS) -
El sector del teatru asturianu, tanto aficionáu como profesional, almitió esti miércoles sentise "sosprendíu" y "desencaxáu" depués de los últimos zarros decretaos pol Gobiernu asturianu, qu'inclúin la prohibición d'espectáculos culturales.
Los portavoces consultaos por Europa Press recuerden amás qu'esto supón un "xiru radical" nel discursu del presidente asturianu, Adrián Barbón, que na rueda de prensa del 14 d'ochobre afirmó con rotundidá que'l sector cultural taba llibre de virus.
El presidente d'Asociación d'Empreses d'Artes Escéniques d'Asturies (Escenasturias), Miguel Quiroga, llamentó que se tomara una decisión como esta, de prohibir la so actividá, ensin contemplar nenguna solución intermedia.
Mostróse amás estrañáu de que naide del Gobiernu asturianu comunicára-yos les restricciones. Esti mediudía tovía nun hubiera nengún contactu con ellos, énte un zarru estrictu n'Asturies, nun contestu nel que se ta poniendo'l focu na hostelería y el comerciu, pero menos nel sector cultural, directamente afectáu.
Escenasturias axunta a les compañíes profesionales de teatru n'Asturies, afectaes directamente pola decisión del Gobiernu. Quiroga comentó que les midíes que yá se taben adoptando nos teatros yeren mui estrictes.
Na mesma llinia, el presidente de Feteas, José Ramón López, resaltó'l control que se realizaba en cada representación teatral, incluyíu'l rexistru de los asistentes y con aforos llindaos. Nun-yos consta amás que se produciera nengún casu COVID-19 vinculáu a nenguna representación n'Asturies.
"Más control qu'equí nun lo hai", comentó López, al que-y choca la decisión adoptada pol Principáu sobre'l teatru. "Nun creo que sía pa prohibilo, anque nós tampoco nun tenemos datos pa xulgar la situación actual porque por delantre siempre tien que tar la salú", dixo, reconociendo que la decisión afecta más gravemente al sector profesional.
SECTOR ENSIN AYUDES
L'actor, guionista y cómicu asturianu Joaquín Pajarón esplicó que yá vivió en primer persona les consecuencies de les restricciones d'hai díes. Con espectáculos programaes, el Principáu decretó'l zarru perimetral d'Uviéu, Xixón y Avilés. La xente nun podía dir y tuvo que devolver el dineru d'unes entraes yá vendíes. "Perdí'l dineru namás salir aquel Boletín Oficial del Principáu d'Asturies", indicó.
"Esto ye un palu bien duru", comentó al ser preguntáu polos últimos zarros. Recordó que, como señalaba Barbón hai menos d'un mes, el COVID-19 nun afectó a la cultura. Ente otres coses, poles midíes más estrictes que teníen de cumplir. Llamentó que l'Alministración asturiana ponga'l focu en desaniciar les consecuencies en sectores como la hostelería de la que s'escaez de la cultura.
