UVIÉU, 13 Nov. (EUROPA PRESS) -
El Teixu, Rede pal Estudiu y Defensa de la Llingua Asturllionesa, convoca'l 'I Concursu Infantil de Recoyida de Toponimia Oral na Valdería', dirixíu al alumnáu menor de 14 años d'esta comarca llionesa.
Con esti concursu quier animase a los rapaces de La Valdería a convertise en pequeños investigadores de la toponimia, escoyendo bonos informantes al traviés de los que puedan conecer los nomes de los sitios de la comarca.
"El modelu que se presenta a los alumnos permite que recueyan todu tipu de topónimos, asina cumo liendas y historias relacionadas conos sitios del sou pueblu", indiquen dende El Teixu al traviés de nota de prensa. Amás, incluise la posibilidá de debuxar un mapa del llugar escoyíu pa la investigación.
Cada participante pue presentar ún o más trabayos a concursu, siempre que correspuendan a pueblos distintos. Nellos, va recoyese'l máximu posible de topónimos, que tienen que tar recoyíos oralmente
entre la población del términu.
La inclusión de material complementariu y la diferencia d'edá
de los participantes va ser un factor consideráu pol xuráu a la hora d'escoyer los trabayos premiaos.
Pa participar nel concursu, los trabayos tienen qu'entregase enantes del 4 d'avientu d'anguaño nes dependencies del CRA Ería Jamuz en Castrucarbón (C/Las Escuelas, 6) o del CEIP Antonio Justel de Castrucontrigu (C/Las Escuelas, s/n).
El resultáu del concursu va conocese'l sábadu 22 d'aviente, mentes la celebración de las VI Xornadas de Padremuñu Lingüísticu y
Cultural, entamaes por El Teixu nel Centru Cultural de Ñogareyas
