UVIÉU, 1 Oct. (EUROPA PRESS) -
La Televisión del Principáu d'Asturies (TPA) y la Radio del Principáu d'Asturies (RPA) van emitir esti vienres 2 d'ochobre a les 12.00 hores la Xunta Estraordinaria qu'entama tolos años l'Academia de la Llingua Asturiana pol Día de les Lletres.
Va ser la primer vez que s'emite en directo per TPA y la sesta que se va radiar per RPA. L'actu nun pudo celebrase en mayu pola crisis sanitaria, polo que va facese nel Aula Magna de la Universidá d'Uviéu, que garra'l testigu del Teatru Campoamor pola situación sanitaria.
Na sesión va acoyese al académicu correspondiente nuevu, Pablo Rodríguez Medina, y Xuan Xosé Sánchez Vicente va recibir el Premiu Nacional de Lliteratura Asturiana.
Amás, l'actu va contar cola asistencia del presidente Adrián Barbón, polo que'l socialista va convertise nel segundu mandatariu qu'asista a esti actu institucional dende que Pedro de Silva dexara la presidencia del Principáu en 1991. Tamién va asistir el rector de la Universidá d'Uviéu, Santiago García Granda, amás de representantes del mundu políticu, social, sindical y cultural d'Asturies.
