Caltién 19 puestos comerciales, va haber prexubilaciones y cerca de 90 despidos, con condiciones d'indemnización ameyoraes
UVIÉU, 15 Oct. (EUROPA PRESS) -
El secretariu Xeneral de CCOO d'Industria, Damián Manzano, anunció esti martes que los trabayadores de Vesuvius ratificaron por un 99% suscribir l'alcuerdu cola empresa, poque la multinacional dió anueche por acabáu'l periodu de consultes. D'esta manera, acepten la propuesta finalista de cese d'actividá de la fábrica vinculada a un plan de reindustrialización.
La firma del alcuerdu producióse esta mesma tarde nel Sasec y implica el caltenimientu de 19 puestos comerciales na planta asturiana, amás de prexubilaciones pa los pocos empleaos que superen los 55 años y cerca de 90 despidos n'Asturies, que se van formalizar el 31 d'ochobre y van cuntar con condiciones d'indemnización ameyoraes según la llexislación vixente.
La clave, según Manzano, ta nel compromisu de desenvolver un plan de reindustrialización nel marcu de la Mesa Técnica, ente la empresa y les alministraciones locales, autonómica y estatal, xunto cola parte social.
En rueda de prensa na sede de CCOO Asturies y xunto de representantes del comité d'empresa de les plantes d'Asturies y Miranda de Ebro, Damián Manzano esplicó que nun hubo opción d'ampliar el periodu de consultes por negativa de Vesuvius, y qu'énte la propuesta finalista que planteaba la empresa los trabayadores aceptaron les condiciones pa evitar pasar a la vía xudicial.
Manzano sostien qu'adoptaron esta decisión col enfotu de que los trabayadores puedan recuperar l'empléu nuna alternativa industrial nueva alcordada y que nun se pierda actividá na Cuenca'l Nalón.
"Esto nun ye un puntu y final, sinón que ye un puntu y siguíu porque siguimos na manifestación", esplica y añade que "va siguir l'enzarru de los trabayadores na Catedral d'Uviéu, anque va cesar la fuelga de fame una vez qu'esta nueche se firme l'alcuerdu".
Ello ye que el dirixente sindical aseguró que van tar vixilantes pa que se materialicen los compromisos de plan de reindustrialización y, de nun concretase, van treslladar les acciones de protesta de la Catedral a les sedes de les entidaes competentes.
Asina, dende CCOO encamienten a les partes implicaes a demostrar que los compromisos yeren más que "palmetaes nel llombu" y garantizar que'l cese de l'actividá sía "el menor posible" con una alternativa industrial viable.
