Actualizado 28/11/2018 18:32

"Trátase d'una novela policíaca ambientada ente Madrid y Uviéu nel sieglu XIX", diz el ganador del Xosefa Xovellanos

UVIÉU, 28 Nov. (EUROPA PRESS) -

L'escritor uviedín Manuel García Menéndez, ganador del Premiu Xosefa Xovellanos, esplica que 'El visitante impropiu' ye una novela d'investigación policíaca ambientada en 1890 ente Madrid y Uviéu. Trátase d'una obra de dellos cientos de páxines protagonizada por un investigador del Cuerpu de Vixilancia, l'antecedente de la Policía Nacional y qu'existió hasta poco depués de la Guerra Civil.

El xuráu del Xosefa Xovellanos, el de más prestixu de les lletres asturianes y qu'entrega cada añu'l Gobiernu autonómicu, decidió conceder el gallardón a esta obra al reconocer nella "una novela ambiciosa con gran oficiu narrativu que representa una propuesta poco habitual na lliteratura asturiana pol so trabayu d'ambientación minuciosu y brillante, amás de tener una trama construyida hábilmente".

L'autor, en declaraciones a Europa Press, esplica que 'El visitante impropiu' nun se pue definir exactamente como una novela negra y quier más falar d'una novela d'investigación policíaca, "porque ye una miscelanea onde se traten munchos temes". La obra principia en Madrid, anque cuasi la totalidá trescurre n'Uviéu, "lo que xeneró un trabayu fondu de documentación".

Manuel García comenta que supón un "arguyu" recibir el Xosefa Xovellanos después de nomes como Berta Piñán, Xandru Fernández, Antón García o Adolfo Camilo Díaz. Amás, destaca'l "nivel" que ta algamando nos últimos tiempos ente la crítica y el públicu noveles como 'Incorrectos', de David Artime.

L'autor, uviedín pero con vínculos familiares en Tinéu, principió publicando dos cuentos infantiles n'asturianu occidental, 'Corcuspín el Rozcayeiru' (1984) y 'Delina nel val.le'l Faloupu' (1985) y esti mesmu añu ganó'l XV Concursu de cuentos curtios del Conceyu de Cangas del Narcea na modalidá d'asturianu occidental col rellatu 'L'home que caéu nun bardión de lata'.

"Tengo vinculación sentimental y familiar col Occidente. Cuando principie escribir nun tenía preseos más que lo que conocía de casa. Agora escribo n'asturianu estándar, pero l'occidental siempre ta ehí", esplica.

Asturianu ofrecido por