Publicado 06/02/2018 20:17

Uviéu pide la oficialidá a la Xunta Xeneral col votu en contra de la oposición

Imagen del Pleno.
EUROPA PRESS.

UVIÉU, 6 Feb. (EUROPA PRESS -

El Plenu del Conceyu d'Uviéu aprobó esti martes encamentar a la Xunta Xeneral a realizar un procesu de diálogu y consensu pola oficialidá del asturianu. La propuesta, presentada polos grupos municipales que formen l'equipu de gobiernu, salió alantre col votu en contra del PP y de Ciudadanos.

La portavoz d'IX, Cristina Pontón, foi la encargada de defender la propuesta. Mentes la so intervención, n'asturianu, la conceyala afirmó que foron numberoses les Comunidaes Autónomes que reconocieron la so llingua como oficial. "Asturies ye una Comunidá Autónoma de segunda y los sos ciudadanos nun ven reconocíos los sos derechos llingüísticos", apuntó. Asina, abogó pol usu normalizáu del asturianu nel Conceyu y por encamentar a la Xunta Xeneral a "avanzar". "Sinón va desaparecer", llamentó.

Tanto'l portavoz del grupu municipal Ciudadanos, Luis Pacho, como'l del PP, Agustín Iglesias Caunedo, apuntaron nes sos intervenciones que defenden la llingua pero "non la so cooficialidá".

A xuiciu de Caunedo, votaron en contra "del usu políticu que se-y quier dar al asturianu". Asina, el portavoz 'popular' indicó que l'únicu gobiernu asturianu que promovio dalgo rellacionao col asturianu "foi'l PP cuando s'aprobó la Llei d'Usu". Dende'l PP apuesten por "convivir col asturianu pero ensin imposiciones. Asturies tien problemes más importantes".

Per otru llau, Luis Pacho preguntóse que si'l tripartitu ye'l gobiernu participativu, por qué la conceyalía de participación nun principia "un procesu participati para preguntar a los ciudadanos si coficialidá sí o non".

La conceyala d'Educación, Mercedes Gonzalez, llamentó que "en plenu sieglu XXI atopamos con una discriminación de la llingua" y criticó a aquellos que "usen l'asturianu pa esconder otros asuntos".

Caunedo fixo referencia a que l'asturianu "pue ser utilizáu por cualquiera". "Yá s'ufierta n'etapes del sistema educativu y mesmo en Primaria impúnxose que la otra alternativa sía Cultura Asturiana", criticó, p'añadir que "namás el 14% de los estudiantes de secundaria" escueyen l'asturianu, y "namás el 3,5% de los bachilleres".

"El PP nun ta con una oficialidá que namás ye demandada por una minoría", concluyó Caunedo.

Asturianu ofrecido por