UVIÉU, 26 May. (EUROPA PRESS) -
El presidente asturianu y secretariu xeneral de la FSA, Adrián Barbón, afirmó esti martes que la crisis sanitaria xenerada pol COVID-19 supón "chequear" tolo referente a la llexislatura. "Va haber que resetealo too, empezando pol presupuestu", señaló.
Asina lo indicó Barbón nun alcuentru dixital con militantes, nel primer aniversariu de les elecciones autonómiques y municipales de 2019, onde'l xefe del Executivu destacó qu'esa victoria de mayu basóse n'actualizar el programa socialista en base al cambiu xeneracional nel partíu y a un programa "qu'apela al arguyu d'asturianía con un programa realista".
Sobre los efectos de la crisis sanitaria na llexislatura, el presidente destacó la necesidá de la inversión en Sanidá frente a los que criticaben el 'gastu' que se recoyía nos presupuestos autonómicos. "Esta crisis val pa mostrar que'l gastu en sanidá ye una inversión", señaló.
Coles mesmes, indicó que'l confinamientu mostró'l valir de la vida nos conceyos pequeños o nes villes mineres frente a la vida urbana. Tamién señaló la necesidá d'invertir en Ciencia a Innovación, lo que al so xuiciu supón "invertir en futuru" polo que destacó que la FSA "va ser un aliáu del sector", amás d'apostar pola necesidá de "dar un pasu de xigante" p'acabar cola resquiebra dixital nes zones rurales.
Con too, Barbón afirmó que la prioridá nestos momentos ye encarar la crisis sanitaria y una vez superada reactivar la economía. Asina, pa facer frente a la crisis social y económica, el xefe del Executivu señaló que'l coronavirus "camudó la llexislatura", polo que ve necesario "chequealo too".
"Va haber que resetealo too, empezando pol presupuestu d'anguaño, ver qué pue facese y qué partíes puen caltenese teniendo en cuenta la prioridá sanitaria y económica", indicó.
Nesi sentíu, Barbón abogó por dexar de llau la confrontación política y defendió un "pactu común ente tolos partíos". "Facer oposición nun ye facer destrucción", destacó'l presidente asturianu frente a les crítiques de partíos de la derecha como PP y Vox.
