La VIII Carrera Solidaria pol Sáhara va ser el 18 de mayu nel estadiu Yago Lamela d'Avilés

   UVIÉU, 2 May. (EUROPA PRESS) -

   La carrera solidaria pol pueblu saharui, impulsada pelos centros escolares cola collaboración del Conceyu d'Avilés, llega a la so octava edición. va celebrase'l domingu 18 de mayu a les 11.00 hores nel Estadiu Municipal Yago Lamela.

   Pa participar nel eventu ye necesariu inscribise con una aportación de dos euros per dosal, que va poder realizase pal publicu polo xeneral a partir de les 9.30 hores nel mesmu estadiu'l día de la cita. La participación ye abierta a toles persones, ensin llende d'edá.

   Según informó'l Conceyu n'una nota de prensa, les inscripciones tamién van poder realizase nos colexos hermanaos coles escueles saharagüis, tantu'l so alumnáu, como docentes y families. Esta modalidá d'inscripción nun ye válida pa persones que nun tengan vinculación colos centros.

   La Carrera Solidaria va cuntar tamién con animación, nesta ocasión, cola participación de los mozos del Taller de Teatru del Serviciu de Mocedá municipal. La recaldación va dedicase a la compra de material escolar pa los centros educativos de los campamentos asitiaos nel desiertu arxelín.

   El pasáu añu participaron 1.300 persones y la recaldación xubió a 4.461,60 euros, provenientes de la vienta de dosales y les aportaciones voluntaries.

   Tamién se pon en marcha la campaña de recoyida de material escolar pa llevar a los estudiantes de los centros escolares de los campos de Tinduf, nel Sahara, y que va poder depositase na Casa de Cultura, na Factoría Cultural y nel Complexu Deportivu Avilés.