29 de marzo de 2020
 
Publicado 16/12/2017 15:28:11CET

La XDLA afirma que nun ye tiempu de "medrana" y de postergar "con argumentos ridículos" la oficialidá

UVIÉU, 16 Dic. (EUROPA PRESS) -

El portavoz de la Xunta pola Defensa de la Llingua Asturiana (XDLA), Carlos Pulgar, afirmó que nestos momentos nun ye tiempu "pa la medrana" y pa postergar "con argumentos ridículos" lo que califiquen como una "oportunidá" p'algamar la oficialidá de la llingua asturiana. "Agora ye'l momentu, tiense la oportunidá y el consensu", señaló.

El portavoz de l'asociación cívica dixo estes palabres esti sábadu en Xixón na entrega de los XXXIII Premios Andrés Solar. El 'Pegollu', la versión positiva del premiu, foi pa los equipos de fútbol UC Ceares, El Rosal, Llosalín y el Stiaua d'Asturies, mentes que'l 'Madreñazu', el gallardón negativu, foi pa la líder del PP asturianu, Mercedes Fernández.

Según Pulgar, estos equipos de fútbol usen con normalidá l'asturianu nes sos xeres diaries "y la normalización n'ámbitos de tanta atracción popular y de participación de la mocedá ye tovía más importante". Mentanto, Mercedes Fernández representa'l "discursu del odiu hacia l'asturianu".

"Nos últimos tiempos ta empeñada en ser la cabazalera de les ridiculeces y los argumentos deliriantes p'atacar l'asturianu,", indicó. Asina, calificó a la líder 'popular' como una "fechicera de la tribu ultra" que trata de "rascar" apoyos "ente lo más casposo de la sociedá asturiana".

"Abandonáu cualquier enfotu en que naide medianamente decente atienda pal so discursu ranciu, tien que s'echar nos brazos de los grupúsculos más intolerantes y fatos. El desesperu pola incompetencia propia fai que se burlle de la intelixencia y de los derechos fundamentales d'una parte importante de la población d'Asturies", señaló.

Per otru llau, tamién criticó los medios de comunicación que "amplifiquen" esti "discursu del odiu" y que "escaecen recordar a l'audiencia les militancies ultres, xenófobes y homófobes de los xeneradores d'esi discursu".

Un discursu que según Pulgar surde porque "pela primer vez en muncho tiempu" ye posible algamar "la igualdá de derechos pal asturianu". "Esto ye lo que los pon nerviosos y lo que los fai esbabayar sangrinamente; nun son p'aguantar la visión de que s'inaugure n'Asturies una etapa de igualdá de derechos, de normalidá y de futuru", indicó.

Amás, señaló que la situación política actual ye un "momentu históricu" y que nun ye tiempu "pa la medrana, nin pa postergar con argumentos ridículos esta oportunidá". "Agora ye'l momentu, tiense la oportunidá y el consensu", indicó, pa dar solución "a un problema que la democracia asturiana vien arrastrando demasiaos años".

Asina, esplicó que nos últimos meses la so organización ta teniendo conversaciones colos partíos políticos "y d'ehí vien el nuestru convencimientu de que se va presentar en nun pasando munchos meses, igual selmanes, una propuesta pa la reforma del Estatutu d'Autonomía". Otra manera, esplició que tán trabayando tamién con ellos na redacción del artículu 4 nel que se va recoyer la oficialidá del asturianu y del gallego-asturianu.

Amás, anunció un "llamamientu" pa facer una "demostración" de que la sociedá asturiana "quier convivir nun marcu más xustu, onde los derechos nun dependan de la llingua que caún o caúna escueya pa vivir". "Tenemos que demostrar na cai a los partíos que tean indecisos cuála ye la decisión acertada", sentenció Pulgar, que calificó 2018 como l'añu "de pasar páxina de la falta de derechos y encarar el futuru del idioma".