Publicado 12/05/2022 12:41

La XDLA diz que'l Principáu tien la "obligación" de presentar una propuesta de reforma del Estatutu

Maniofestación por la oficialidad de la lengua asturiana.
EUROPA PRESS

UVIÉU, 12 May. (EUROPA PRESS) -

La Xunta pola Defensa de la Llingua Asturiana (XDLA) volvió reclamar esti xueves al Conseyu de Gobiernu que presente una propuesta de reforma del Estatutu d'Autonomía que recueya la declaración d'oficialidá.

"Ye la so potestá esclusiva y la so obligación. Ye amás una promesa electoral de la FSA", indicó la organización al traviés d'una nota de prensa onde calificaron de "éxitu" la manifestación pola oficialidá del asturianu y del gallego-asturianu qu'entamaron el sábadu pasáu y na que participaron miles de persones.

Nesi sentíu, afirmen que la reivindicación d'esti marcu llegal "tien más puxu que nunca" a pesar "de los qu'apuesten por apostalgar la declaración de la oficialidá a la siguiente llexislatura, dando por inhabil l'añu llargu que queda de la presente".

Asina, calificaron de "falses" les declaraciones del presidente Adrián Barbón al otru día de la manifestación afirmando que faltaba un votu pa poder aprobar l'Estatutu porque "pa saber si hai 6 o 26 votos favorables, pa poder afirmar que tal o cual partíu va votar en contra tien que producise esa votación".

Otra manera, dieron la razón al secretariu xeneral de Foru Asturies, Adrián Pumares, qu'esti miércoles instó al presidente a presentar la so propuesta d'oficialidá si ye que la tien. Con too, recordaron que paez un "órdagu poco creyible" porque hai selmanes Foru votó en contra d'una proposición non de llei presentada por Podemos "que pidía esactamente eso mesmo".

"Amás tampoco esclarió si nesi hipotéticu escenariu diba buscar l'alcuerdu o diba imponer otra vez condiciones estrambóliques inasumibles pa los demás o que recorten les posibilidaes de l'aplicación futura de la oficialidá", señalaron dende la XDLA.

Por eso, encamentaron al Conseyu de Gobiernu a llevar a la Xunta Xeneral una propuesta de reforma del Estatutu y a tolos partíos "democráticos" a que "debatan, argumenten, enmienden, consensúen y terminen por aprobar una redacción definitiva del artículu 4 que-y ponga puntu final a una inxusticia histórica que padecen les asturianes y los asturianos".

"Cuando la voluntá del pueblu s'espresa tantes veces con madurez, los sos representantes d'anguaño tienen que tar al altor pa nun dexar esa reivindicación ensin respuesta. Nun hai razón pa esperar a otres elecciones", sentenciaron.

Contador
Asturianu ofrecido por