UVIÉU, 24 Feb. (EUROPA PRESS) -
El representante de XEGA Borja Ibaseta afirmó que dende l'asociación entienden que les declaraciones de la directora d'Igualdá d'Asturies, Nuria Varela, son personales "y que nun reflexen en nengún casu la posición oficial del Gobiernu del Principáu". Nesi sentíu, calificó d'erru "ximelgar les redes sociales pa enfrentar a colectivos como'l Feminista y el LGTBI que comparten base ideolóxica, marcu teóricu y activismu".
En declaraciones a Europa Press, Ibaseta faló del polémicu tweet de Varela, que calificó de "erru históricu" la decisión d'IU d'espulsar al Partíu Feminista d'España pola so posición contra'l colectivu trans. Al traviés de la so cuenta de Twitter, Varela señaló que vía "incomprensible" que la coalición "se plegara" a les presiones de les "disidencies sexuales".
Preguntáu por esti fechu, el representante del colectivu LGTB asturianu señaló que pa XEGA eses declaraciones "fíxoles dende una cuenta personal de Twitter y nun reflexen en nengún casu la posición oficial del Gobiernu del Principáu".
Con too, indicó que nun comparten "la terminoloxía y posicionamientu" del tweet de Valera "y pareznos un erru ximelgar les redes sociales pa enfrentar a colectivos como'l Feminista y el LGTBI que comparten base ideolóxica, marcu teóricu y activismu".
"Entendemos que les polémiques en redes sociales namás provoquen frustración, enfrentamientu y torguen dar atención a lo importante", esplicó'l miembru de Xega, que recordó que la prioridá ye l'aprobación na Xunta Xeneral de la Llei Integral Trans que quedó paralizada la llexislatura pasada.
Per otru llau, mostró'l so apoyu a la decisión tomada por IU, formación a la qu'aprovecharon pa tresmitir el so respaldu "pol so apoyu ensin resquiebres al Feminismu polo xeneral y al colectivu LGTBI en particular".
