25 de febrero de 2020
 
Actualizado 20/01/2020 15:19:43 CET

Xuan Xosé Sánchez Vicente algama'l Premiu Nacional de Lliteratura Asturiana na so segunda edición

Xuan Xosé Sánchez Vicente.
TWITTER.

UVIÉU, 20 Ene. (EUROPA PRESS) -

L'escritor asturianu Xuan Xosé Sánchez Vicente ye'l ganador de la segunda edición del Premiu Nacional de Lliteratura Asturiana pola so trayectoria intelectual y lliteraria "que lu convierten nun referente a lo llargo de cinco décades y nún de los mayores activos de la lliteratura asturiana".

Esti premiu entamólu l'Academia de la Llingua Asturiana en 2016 pa facer reconocencia del llabor normalizador que representa la creación lliteraria y el papel fundamental que xueguen los escritores. El gallardón concédese al "conxuntu de toa una trayeutoria lliteraria, fecha a lo llargo del tiempu en llingua asturiana y la so contribución a la dignificación social del asturianu".

El xuráu, aconceyáu'l miércoles, día 15 de xineru, tuvo presidíu pol presidente de l'ALLA, Xosé Antón González Riaño. Tamién formaben parte los académicos Ana María Cano González, Xosé Ramón Iglesias Cueva y Carmen Muñiz Cachón; amás de los profesores de la Universidá José Luis García Martín y Leopoldo Sánchez Torre. Fixo de Secretariu'l director xeneral de Planificación Llingüística y Normalización, Antón García, en representación del Gobiernu d'Asturies.

Nesta edición, les candidatures presentaes foron les de la escritora Lourdes Álvarez García y los escritores Adolfo Camilo Díaz y Xuan Xosé Sánchez Vicente. El xuráu dexó afitao que cualquiera d'estes persones yera merecedora del premiu magar que, por unanimidá, decidiere conceder el II Premiu Nacional de Lliteratura Asturiana 2020 al escritor D. Xuan Xosé Sánchez Vicente.

Según el xuráu, Sánchez Vicente ye merecedor del gallardón pola "so trayectoria intelectual y lliteraria que lu convierten nun referente a lo llargo de cinco décades y nún de los mayores activos de la lliteratura asturiana". Tamién indicaron qu'amás de cultivar "con dedicación constante y aciertu tolos xéneros, abrió caminos nuevos nesta milenaria llingua a partir d'un fondu conocimientu y respetu pola tradición, de la que foi de los primeros estudiosos y divulgadores".

El Premiu Nacional de Lliteratura Asturiana, que tien calter trianual y que ganare na so primer edición l'escritor Xuan Bello, entregaráse-y a Sánchez Vicente'l 8 de mayu coincidiendo cola celebración n'Uviéu del Día de les Lletres Asturianes y lleva arreyada la espublización d'una pequeña muestra de la obra lliteraria del autor y la concesión d'un Medayón Conmemorativu, diseñáu pol escultor Adolfo Manzano.