UVIÉU, 23 Sep. (EUROPA PRESS) -
El plenu de la Xunta Xeneral refugó trespasar la xestión del Ingresu Mínimu Vital al Gobiernu del Principáu como pidía'l grupu parllamentariu del PP al traviés d'una moción debatida na sesión d'esti xueves.
La moción presentada defendía "encamentar al Conseyu de Gobiernu a que, énte la xestión nefasta del ingresu mínimu vital que ta faciendo'l Gobiernu central, fundamental pa los miles de families más vulnerables d'Asturies, solicite al Gobiernu de la nación la tresferencia a la nuestra Comunidá Autónoma, lo más ceo, de la xestión de l'ayuda, nos mesmos términos y condiciones y col mesmu nivel competencial que se concedió a les comunidaes autónomes del País Vascu y Navarra, amás de los recursos económicos necesarios pa facer la xestión a lo llargo del procedimientu de tramitación del ingresu mínimu vital".
La propuesta defendióla la diputada del PP, Reyes Fernández Hurlé, que manifestó que la xestión del IMV foi mala y asina lo reconoció'l mesmu Adrián Barbón, pero añadió qu'ente lo malos que son nel Gobiernu rexonal y lo malos que son nel Gobiernu d'España, nesta cuestión queda col Gobiernu del Principáu.
Hurlé aseguró que "ta claro y rescampla que lo que vendieron como escudu social nun valió". "La probeza severa medró na nuestra rexón d'una forma esponencial. L'estáu de bienestar nun se caltién col IMV, caltiénse xenerando empléu y baxando impuestos a los asturianos", dixo la diputada del PP.
Reyes Hurlé añadió que les mesmes ONG dicen que lo del IMV ye un "despropósitu" y incidió que si hai una cosa clara ye que "cuando los socialistes gobiernen a los ciudadanos-yos va peor".
La diputada del PSOE, Ana Isabel González llamentó que la intención de la propuesta del PP sía siempre la de gastar al Gobiernu, entemeciendo datos y cuestiones que nun se puen entemecer. Recordó que los asturianos, mentes nun reciben l'IMV siguen cobrando'l Salariu Social, una prestación refugada pol PP.
Pa Ciudadanos, según indicó Laura Pérez Macho, anque primero'l so grupu pensaba apoyar la moción del PP les últimes decisiones xudiciales llevaron a l'abstención.
Dende Podemos, Rafael Palacios foi mui críticu cola xestión del IMV. Con too, refugó'l cuestionamientu que'l PP fai d'esta prestación y consideró "superficial y vacia de conteníu" la moción de los 'populares'.
El diputáu d'IX, Ovidido Zapico manifestó que'l principal problema de la derecha cuando debaten sobre polítiques sociales ye que "nun son creíbles". "En qué asturianos piensen ustedes, creo que nun piensen en toos, ustedes tán colos que nun quieren xubir el SMI y non tán colos que pal IMV ye un dique de contencción pa la probeza severa y ashí anicia'l so gran problema", retrucólu a la diputada del PP.
A xuiciu de Foru Asturies, nesta cuestón el Gobiernu de Pedro Sánchez ta enllenando la paciencia de los españoles. El diputáu Adrián Pumares consideró qu'Asturies tien esperiencia en xestionar esti tipu d'ayudes.
Dende Vox consideren que'l PP cai na contradicción y son incoherentes al pidir más. "Tamos mui alloñaos de la postura del so partíu", dixo la diputada de Vox, Sara Álvarez.
