Actualizado 03/05/2011 15:50 CET

La Xunta Xeneral celebra esti miércoles la 'Llectura de testos lliterarios n'asturianu'

UVIÉU, 3 de Mayu (EUROPA PRESS)

La Xunta Xeneral d'Asturies, en collaboración cola Conseyería de Cultura, celebra esti miércoles, a les 13.00 hores, l'actu 'Llectura de Testos Lliterarios n'Asturianu', enmarcáu dientro de la XXXII 'Selmana de Les Lletres Asturianes', dedicada al escritor llangreanu Manuel d'Andrés Fernández 'Manfer de la Llera'.

L'actu, que va tener llugar nel salón Europa de la Xunta Xeneral, va presentalu la presidenta del parlamentu asturianu, María Jesús Álvarez González, que va entamar tamién la llectura.

Darréu, va siguir la llectura'l presidente d'Asturies, Vicente Álvarez Areces, siguíu del delegáu del Gobiernu, Antonio Trevín; la conseyera de Cultura, Mercedes Álvarez; el conseyeru d'Educación, Herminio Sastre; y la de Bienestar Social, Noemí Martín.

Los participantes van lleer una selección de testos escritos n'asturianu incluyíos nuna publicación editada pola Xunta Xeneral por cuenta d'esta celebración y que lleva por títulu 'Cuánto carbón saldría', estrayíu d'un versu de Manfer de la Llera. El llibru caltién un total de 40 relatos breves escritos por otros tantos autores asturianos, especialmente pa esta ocasión.

Coles mesmes ta previsto que participen, ente otros, el síndicu mayor, Avelino Viejo; el rector de la Universidá d'Uviéu, Vicente Gotor; y la presidenta de la Real Academia de la Llingua, Ana María Cano. Tamién van intervenir diputaos de los cuatro grupos políticos representaos na Xunta Xeneral, diputaos y senadores por Asturies y conceyales.

Asturianu ofrecido por