UVIÉU, 18 Ene. (EUROPA PRESS) -
La Xunta Xeneral del Principáu despidió esta mañana al expresidente del Gobiernu y senador socialista, Vicente Álvarez Areces, con "agradecimientu" a un "home honestu y innovador" que contribuyó a "la tresformación" de Xixón y d'Asturies.
Diputaos de toles formaciones y una diversidá grande de representantes de la sociedá asturiana sumáronse al reconocimientu y dieron el pésame a la familia, que tuvo acompañada por responsables del PSOE; miembros del Gobiernu del Principáu; del presidente del Gobiernu asturianu, Javier Fernández; y del presidente de la Xunta Xeneral, Pedro Sanjurjo.
Depués de les xornaes d'esti xueves y vienres, el veloriu va agora pal Conceyu de Xixón, onde va siguir l'homenaxe al políticu, que va concluyir esti domingu a les 12.00 hores con una despidida civil en La Llaboral.
Ente les personalidaes que pasaron pel parllamentu autonómicu esta mañana destaca la presencia del presidente d'honor vitaliciu de la Federación Socialista Asturiana (FSA-PSOE), Pablo García, que llegó acompañáu pol secretariu xeneral de la FSA, Adrián Barbón, y la vicesecretaria xeneral del PSOE, Adriana Lastra.
En declaraciones a los medios, Pablo García destacó la coherencia personal y política d'Areces a lo llargo de tola so vida. "Asturies pierde un políticu bonu y yo un amigu. Yera un políticu de los d'enantes y de los d'agora porque siempre lo vi con vitalidá y cola verdá per delantre", afirmó.
Tamién foi dar el pésame l'expresidente de la Xunta de Galicia, el socialista Emilio Pérez Touriño, que lo definió como home "honestu" y amigu "de tola vida" dende la so etapa d'activista estudiantil y políticu vinculáu al Partíu Comunista na so época universitaria en Santiago de Compostela. "Hasta l'últimu momentu caltuvo los sos valores d'igualdá, xusticia y solidaridá", dixo, reconociendo la so contribución na llucha contra'l franquismu y en defensa de la democracia. "Marcho un home entrañable y especialmente queríu, con una buelga imborrable en Galicia", aseguró.
Coles mesmes, la directora de la Fundación Princesa d'Asturies, Teresa Sanjurjo, quixo resaltar "la so llucha poles llibertaes y la democracia". Amás, emponderó la so "collaboración magnífica" cola Fundación y recordó cómo hai namás unos díes tuvieron falando con motivu del fallecimientu de Juan Cueto y sobre la pérdiga que suponía. D'esta manera, Sanjurjo quixo dir al veloriu pa treslladar el so "agradecimientu" y "el sentimientu de pérdiga que dexa".
El secretariu xeneral d'UXT d'Asturies, Javier Fernández Lanero, sostién que foi "el políticu más progresista d'Asturies", resaltando la so capacidá como alcalde pa tresformar Xixón hasta consiguir que toos se sintieren arguyosos de la so ciudá y fuera la envidia en toa España". "N'Asturies demostró la so capacidá innovadora y el so esfuerciu por sumar a tola sociedá", dixo, destacando la so cercanía a l'actividá sindical. Pa Lanero, Areces foi "una especie de paragües" nel que toos se podíen abellugar pa defender causes importantes.
El presidente del Tribunal Suprerior de Xusticia d'Asturies (TSXA), Ignacio Vidau, recordó'l so "tratu esquisitu" y el so llabor nel procesu de cesión de les tresferencies de xusticia a la comunidá autónoma. Considera que foi una persona "realmente estraordinaria y políticu de raza, con una vocación de serviciu públicu especial". Pa Vidau, Areces foi un "personaxe fundamental" pa la tresformación de Xixón, pa la reestructuración de la esquierda asturiana y pa la modernización de la comunidá.
Vicente Álvarez Areces (Xixón, 1943), morrió na madrugada d'esti xueves, 17 de xineru, por causa de un derrame cerebral a los 75 años. Depués de los sos primeros años d'activismu estudiantil y políticu vinculáu al Partíu Comunista, en 1983 nomáronlu director provincial del Ministeriu d'Educación y Ciencia n'Asturies pol Gobiernu de Felipe González, y en 1985 marchó a Madrid como xefe del Serviciu d'Inspección Técnica d'Educación nel Ministeriu. Llogró l'alcaldía de Xixón en 1987 y tuvo al frente del Gobiernu del Principáu d'Asturies ente 1999 y 2011. Agora yera senador y exerció la portavocía del Grupu Socialista ente ochobre de 2016 y xunu de 2017.
