Publicado 15/02/2018 17:08

Aiko taldeak dantza tradizionalen asteburua egingo du martxoaren 3an eta 4an, Areatzan

Aiko taldearen erromeria
AIKO

BILBO, 15 Feb. (EUROPA PRESS) -

Aiko taldeak dantza tradizionalen asteburu "intentsiboa" antolatu du martxoaren lehen astebururako, Areatzan (Bizkaia). Katalin Zarate, Anartz Ormaza, Patxi Laborda eta Sabin Bikandi izango dira dantza ikastaroa emateko arduradunak martxoaren 3an eta 4an, "ikasteko metodologia dibertigarria, argia, erraza eta bizi garen mundurako egokia erabiliz".

Ikastaroan parte hartzeko izena emateko epea zabalik dago, eta 50 euroko prezioa du. Hala nahi izanez gero, egonaldia eta jatorduak ere har daitezke Areatza hotel-bainuetxean, Aiko taldeak prentsa ohar bidez jakinarazi duenez.

"Dantza mokauak" izeneko ikastaroak oso eduki anitzak eskainiko ditu, eta Luzaideko dantzen jauzien sekretuak, bikoteka egiten diren "porrua, txotisa edo zortzikoa" dantzen garrantzia, balsak eskaintzen dituen erritmo eta aukera ugariak, korroan egiten den dantza ulertzeko eta ikasteko oinarriak eta "Axuri beltzara" kontserbatzen den dantza kantatu apurrenetakora hurbiltzeko aukera eskainiz.

Gainera, ikastaroa Areatzan egiten denez, eta udalerria dagoen haranari keinu eginez, Arratiako jotaren oinarrizko pausoen ikasketara egongo da zuzenduta ikastaroaren edukietako bat.

Bestalde, Aiko taldeak "Torrijaldia 2018" Aratusteetako erromeria tradizionala eskainiko du igandean, otsailaren 18an, 18:00etan, Durangoko Plateruena Kafe Antzokian. Jai horretan ohikoa denez, mozorroek ukitu berezia emango diote erromeriari.