Belaunaldien arteko I. Zine Foruma asteazkenean hasiko da Bilbon

Actualizado 2017/1/24 18:02:53 CET
Belaunaldien arteko I. Zine Foruma asteazkenetik Bilbon
BILBOKO UDALA

BILBO, 24 (EUROPA PRESS)

Bilboko Udalak Belaunaldien arteko I. Zine Foruma antolatu du, "Bilbo, Hiri Adiskidetsua Adinekoekin" izeneko bigarren planaren barruan (B+60). Zikloa urtean zehar egingo da asteazkenean hasiko da, urtarrilaren 25ean, Stephan Robelinen "Et si on vivait tous ensemble?" filmarekin.

Emanaldiak Indautxuko Carmen aretoan izango dira, hileko azken asteazkenetan, arratsaldeko 19:00etan, urtarrilean, otsailean, martxoan, maiatzean, urrian eta azaroan. Sarrera doakoa izango da, aretoa bete arte.

Zikloan ikusleen artean elkarrizketa eta gogoeta sustatuko duten sei film proiektatuko dira. "Jarduera hauekin adin eta jatorri kultural desberdinetako pertsonen parte hartzea bultzatu eta hiriko ekitaldietan belaunaldi arteko bizikidetza sustatu nahi dugu", Iñigo Pombo Bilboko Udaleko Gizarte Ekintzako zinegotziak adierazi duenez.

Proiektatuko diren filmak gaur egungo gaietakoak izango dira, helduentzat eta herritar ororentzat: dibertsitate funtzionala, etxe kolaboratiboak, mendekotasuna, belaunaldien arteko harremanak, dibertsitate kulturala eta harreman afektiboak.

Pombok azaldu du urte askotan "zahartzaroari buruzko ikuspegia bakarra" izan dela, "estereotipo negatiboetan oinarrituta, esaterako, mendekotasuna, ahultasuna, hauskortasuna eta abar, zahartzeak dakartzan arazo biologikoak soilik kontuan hartuta".

"Adineko pertsonak talde homogeneoa eta pasiboa zirela uste genuen. Kontzeptu hori zaharkituta geratu da eta gaur egun zahartze aktiboaz hitz egiten dugunean, adinekoen belaunaldi aitzindari batez ari gara, aipatutako estereotipoak apurtu nahi dituena, zeregin aktiboa behar duen talde heterogeneo modura aurkeztuz, bere nortasuna berreraikitzeko eta berriro definitzeko", azaldu du.

"TRESNA ANALITIKOA"

Jarduera honen bidez, Bilboko Udalak "tresna analitiko bat" eskaini nahi die adineko bilbotarrei, aukera eta ekintzarako askatasuna neurtzeko eta sustatzeko, eta beren arazoak aztertzeko eta irtenbideak bilatzeko agente izan daitezen. Horrela, adinekoak komunitatean eta beste adin eta kultura batzuetako taldeetan integratzea bultzatu nahi da.

Horretarako, proiekzioetara belaunaldi desberdinetako pertsonak joatea eta belaunaldien arteko eztabaidarekin filmetako gai nagusiei buruzko gogoeta egitea espero dute antolatzaileek, "elkar aberasteko, eta adinekoen inguruko aurreiritziak eta estereotipo faltsuak leuntzeko".

Modu honetan, ostegunean ikusgai izango den "Et si on vivait tous ensemble?" filmaren ondoren, Eric Lartigauren "La famille Bélier" (otsailak 22), Tal Granit eta Sharon Maymonen "Mita Tova" (martxoak 29), Michael Hanekeren "Amour" (maiatzak 31), Ira Sachsen (Love is Strange) (urriak 25) eta Josu Inchausteguiren "A cambio de nada" (azaroak 29) filmak proiektatuko dira.