BILBO, 11 Dic. (EUROPA PRESS) -
Euskal Herriko Unibertsitateak (EHU) ekitaldi bat antolatu du Bilboko Unibertsitatearen 50. urteurrena ospatzeko, egungo EHU sortu zuen erakunde akademikoetako bat izan baitzen. Ekitaldia asteazkenean izango da, abenduaren 12an, arratsaldeko 18:00etan, Bilboko Bizkaia Aretoan.
Iñigo Urkullu Eusko Jaurlaritzako lehendakaria izango da ekitaldiko buru, eta harekin batera izango dira Nekane Balluerka EHUko errektorea, Goyo Monreal Bilboko Unibertsitateko Bizkaiko campuseko errektoreorde ohi eta EHUko errektore ohia, Juan Maria Aburto Bilboko alkatea eta Patxi Juaristi Bizkaiko campuseko errektoreordea.
Hitzaldiak hasi baino lehen, agintariek Bizkaia Aretoko atondoan ikusgai jarriko duten "Bilboko Unibertsitatearen 50. urteurrena" erakusketa bisitatuko dute Paulí Dávila eta Luis María Naya EHUko irakasleek gidatuta eskutik. Dávila eta Naya dira erakusketaren komisarioak.
EHUk jakinarazi duenez, Bilboko Unibertsitatea lehen euskal unibertsitate publikoa izan zen. 1968ko ekainean sortu zen, Bilbon eta inguruetan hazten zihoan biztanleriak goi mailako hezkuntzaren arloan eginiko eskariei erantzuteko asmoz, Bizkaiko Aldundiak, Bilboko Udalak eta ekonomia eta gizarte arloetako hainbat erakundek eskatuta, hazkunde ekonomikoaren testuinguru horretan unibertsitateko eskaintza urria baitzen.
Bilboko Unibertsitatea martxan jartzeko, Zientzia Politiko, Ekonomiko eta Komertzialen Fakultateak eta Medikuntza eta Zientziak fakultate berriek bat egin zuten. Unibertsitate barruti propiorik gabe sortu zen, eta Juan Echevarría Gangoiti izan zen lehen errektorea. Bere lehen egoitza Bilboko Botika Zaharra kaleko Nautika Eskola izan zen.
Unibertsitatea Leioan eraikitzeko lanak 1970ean hasi ziren, eta 1972-1973 ikasturtean hasi ziren lehen klaseak ematen Zientzia eta Medikuntza fakultateetan. Denbora pasa ahala, beste goi mailako ikastetxe batzuk gehitu ziren unibertsitatera.
Lehen urte horietan, 1970eko hamarkadako legeria berrira egokitu behar izan zen unibertsitatea, irakasle eta administrazio eta zerbitzuetako langile berriak gehituz ikasleen gorakadari erantzuteko; izan ere, 1968ko 3.000 ikasletik, 1976ko 15.000 ikaslera pasa zen.
Ondoren, 1977an, euskal unibertsitate barrutia sortu zen Arabako eta Gipuzkoako unibertsitate ikastegiak sartzearekin batera. Hiru urte geroago, 1980an, izen aldaketa onartu zen eta Euskal Herriko Unibertsitatea jaio zen.
