BILBO, 25 Feb. (EUROPA PRESS) -
Bizkaiko Elkarte Artistikoak 75. urteurrenaren harira prestatu duen olerki bilduma aurkeztuko du ostiralean, otsailaren 26an, Bilboko Udalaren Bidebarrieta Kulturgunean. Aurkezpenean Iñaki Basabe kantautoreak parte hartuko du, elkarteko rapsodekin batera.
Elkarteko bazkideen 200 poemaz eta 70 irudiz osatutako liburua da. Gainera, Juan Carlos Mestre 2009ko Espainiako Poesia Sari Nazionalaren kolaborazioa ere izan du lanak, Bilboko Udaleko iturriek jakinarazi dutenez.
Bizkaiko Elkarte Artistikoa 1945ean sortu zen, eta egoitza Bilbon izan zuen Bizkaiko lehenengo kultur elkartea izan zen. Margolari, poeta, rapsoda eta arte zale askok osatzen dute. Erakusketak, hitzaldiak, errezitaldiak, poesia solasaldiak eta liburu aurkezpenak antolatzen ditu, besteak beste.
Liburuaren aukezpena 19:00etan hasiko da, Bidebarrietako liburutegiko areto nagusian. www.bilbaokultura.eus/bidebarrietakulturgunea webgunean eskuragarri dauden doako gonbidapenetako bat erreserbatzea ezinbestekoa izango da.
Egungo osasun egoeraren ondoriozko segurtasun neurriak direla eta, ekitaldi aretoko ateak 18:15ean irekiko dira, bertaratutakoak beren aulkietan egokitzeko. Ezin bada parte hartu, aurkezpena 'streaming' bidez jarraitu ahal izango da www.kulturguneatb.eus webgunean. Indarrean dauden babes eta higiene neurriak zorrotz beteko dira, eta maskara nahitaez erabili beharko da.
