BILBO, 13 (EUROPA PRESS)
Bizkaiko Foru Ogasunak 1.634,3 milioi euro bildu ditu 2018ko lehen bi hilabeteetan, hots, 2019ko ekitaldirako zerga sarreren aurrekontuaren %20,8. Horrela, otsaila arteko zerga bilketa %3,0 igo da iazko aldi berarekin alderatuta, orduan 1.587,0 milioi euro bildu baitziren.
Foru erakundeak jakinarazi duenez, urtarrilean eta otsailean bildutako kopurutik, 769,5 milioi euro zuzeneko zergari dagozkio, 2018an baino %1,3 gehiago. Atal horretan PFEZn izandako %4,4ko hazkundea nabarmendu da; Sozietateen gaineko Zerga %35,3 jaitsi da.
Zeharkako zergapetzearen bitartez 857,3 milioi euro bildu dira, hau da, iaz baino %4,7 gehiago. Kudeaketa propioaren BEZ %0,6 hazi da eta, zerga berezien artean, Hidrokarburoen gaineko Zergak izandako hazkundea nabarmendu da (%17,6).
Azkenik, tasen eta beste diru-sarrera batzuen bidezko zerga bilketa 7,5 milioi eurokoa izan da, aurreko urteko aldi berean bildutakoa baino %12,4 gutxiago, alegia.
Bizkaiko Ogasunak gogoratu du otsailean oraindik ez dela gauzatu BEZaren eta zerga berezien lehenengo doikuntza beste aldundiekin eta Estatuarekin. Era berean, ez dira gauzatu urteko lehenengo hiruhilekoari dagozkion zerga zehatzen likidazioak.
