BILBO, 17 (EUROPA PRESS)
Covid-19 koronabirusak eragindako 71 hildako zenbatetsi dira Euskal Autonomia Erkidegoan (EAE) otsailaren 8tik 14ra bitarteko astean, aurrekoan baino 28 gutxiago. Gainera, 499 kasu positibo berri aurkitu dira asteartean, bezperan baino 46 gehiago, eta positibo tasa %4,6ra jaitsi da, Eusko Jaurlaritzako Osasun Sailak asteazken honetan emandako datuen arabera.
Zehazkiago, 10.874 test diagnostiko egin dira asteartean Araban, Bizkaian eta Gipuzkoan (7.635 PCR eta 3.509 test antigeno), aurreko egunean baino 1.309 gehiago, eta horien guztien artetik 499 kutsatze berri aurkitu: 56 Araban, 327 Bizkaian, 109 Gipuzkoan eta zazpi EAEtik kanpo bizi diren pertsonetan.
Adin tarteka, 0-18 urteko taldean 104 kasu berri izan dira azken egunean eta 100.000 biztanleko 14 eguneko intzidentzia tasa 639,15 kasukoa da; 19-39 urteko taldean 109 positibo izan dira (444,00), 40-64 urtekoenean 205 (416,04), 65-79 urtekoenean 55 (254,24) eta 80 urtetik gorakoen artean 26 (273,60).
Halaber, koronabirusaren intzidentzia tasa metatua 424,83 kasura jaitsi da erkidego osoan (Araban 386,12, Bizkaian 464,04 eta Gipuzkoan 361,99), eta gaitzaren birsorkuntza tasa 0,79ra (Araban 0,72, Bizkaian 0,85 eta Gipuzkoan 0,69).
Hiriburuetako egoerari dagokionez, intzidentzia tasa 422,03 kasukoa da Gasteizen, 506,53koa Bilbon eta 338,83koa Donostian. 5.000 biztanletik gorako udalerrien artean, Bizkaiko Berango, Bermeo, Derio, Getxo, Gueñes, Leioa, Ondarroa, Santurtzi eta Sopela, eta Gipuzkoako Astigarraga, Bergara, Elgoibar, Legazpi, Lezo eta Onati eremu gorrian daude, 500dik gora kasu dituztelako 100.000 biztanleko 14 eguneko intzidentzia tasa metatuan.
Azkenik, ospitaleen egoera hizpide hartuta, koronabirusaren ondorioz 61 pertsona erietxeratu dituzte asteartean, eta guztira 421 lagun daude ospitaleetan, aurreko egunean baino 17 gutxiago. Gainera, gaitza duten 159 pertsona zainketa intentsiboen unitatean (ZIU) daude, bezperan baino bederatzi gutxiago.
