DONOSTIA, 11 Dic. (EUROPA PRESS) -
Donostialdea ESIak Kudeaketa Aurreratuaren Euskal Saria lortu du kudeaketako "Pertsonak" elementuaren barruan, ezagutzaren kudeaketako (Izaki) eta euskararen kudeaketako (Esanez Izan) praktika onengatik. Saria kudeaketaren arloko aitorpen gorena da Euskadin, eta kudeaketa praktikarik aurreratuenak dituzten eta intereseko talde guztien gogobetetasuna modu orekatuan zaintzen duten erakundeak aintzatesten ditu.
Asteazkenean jasoko du saria Donostialdea ESIak, abenduaren 12an, arratsaldeko 18:30ean hasita Bilboko Euskalduna jauregian egingo den ekitaldi batean. Donostialdea ESIak azpimarratu du "saria gure erakundeko profesional guztien lankidetza, parte hartze eta inplikazioari esker" lortu duela.
Donostialdea ESI osasun erakunde integratua Osakidetzaren parte da, eta Donostia Unibertsitate Ospitaleak eta 32 osasun zentro eta anbulatoriok osatzen dute. Bere jarduera eremuan sartzen dira Donostia eta Oarsoaldeako, Donostialdeako eta Urola Kostako beste herri batzuk: guztira, 400.000 biztanle inguru.
Erakundean Kudeaketa Aurreratuaren Eredua erabiltzen da kudeaketa sistema ebaluatu eta hobetzeko, eta Euskalit erakundeko Ebaluatzaile Klubeko kideen kanpo ebaluazioa jaso ondoren lortu du saria.
SARIA
Euskal erakundeen arteko lehiakortasunaren funtsezko elementua den kudeaketa aurreratuaren garrantzia sustatu eta zabaltzeko sortu da Kudeaketa Aurreratuaren Euskal Saria. Kudeaketa praktiketan garapen eta aurrerapen maila zehatz bat erakusten duten enpresa, heziketa zentro, osasun zentro eta bestelako erakundeei ematen die Eusko Jaurlaritzak. Euskalit da aitortza sariak banatzeko ardura duen erakundea.
Sariak bi helburu ditu: kudeaketan aurreratuen dauden erakundeak identifikatzea, beste batzuentzako sustagarri eta erreferente izan daitezen, eta erakunde horiek egindako ahalegina eta kudeaketan lortutako aurrerapen maila publikoki aitortzea.
Saria jasotzeko, erakunde batek aldez aurretik bere kudeaketa sisteman garapen maila jakin bat lortu duela erakutsi behar du. Horretarako, Euskalitek euskal erakunde eta enpresei Kanpo Kontrastearen eta Kanpo Ebaluazioaren zerbitzuak eskaintzen dizkie, eta Kudeaketa Aurreratuaren Eredua ezarri.
Bi zerbitzu horien bidez erakunde baten kudeaketaren azterketa orokorra eta sistematikoa egiten dute erakundeaz kanpoko aditu independenteek. Erakundearen aurrerapen maila, alderdi sendoak eta hobetu beharrekoak objektiboki erakusten ditu aztertekak, eta "ispilu gisa" balio die erakundeei hausnarketa eta autoebaluazioa egiteko orduan.
Euskaliteko Ebaluatzaile Klubeko kideez osatutako taldeek egiten dute azterketa. Klub horretan 2.000 lagun inguru daude, gehienak gerentzia eta zuzendaritza postuetan daudenak, eta Euskalit modu altruistan laguntzen dutenak, kudeaketaren arloan duten ezagutza eta esperientzia partekatuz.
