BILBO, 13 (EUROPA PRESS)
Euskal Herriko Unibertsitatearen (EHU) Zientzia Astearen 20. edizioa azaroaren 6tik 8ra egin da, sarean, osasun egoeraren ondoriozko murrizketak direla eta, eta 5.567 bisita izan ditu. Aurtengo ediziorako prestatutako eduki guztia www.zientzia-astea.eus webgunean egongo da ikusgai hurrengo hilabeteetan.
Ekimenaren arduradunek nabarmendu dutenez, urtero bezala, aurten ere "harrera bikaina" izan du Zientzia Asteak adin guztietako herritarren artean, egungo osasun eta gizarte testuingurua dela eta, beste batzuetan baino bisitari gutxiago izan dituen arren.
Horrela, Zientzia Asteak 5.567 bisita izan ditu, webguneko bisitak, Youtubeko bistaratzeak, lantegi interaktiboetako izen-enateak, 'streaming' bidez eskainitako hitzaldiak eta Barakaldoko Clara Campoamor hiri zentrora egindako bisita presentzialak zenbatuta.
Hain zuzen, 2020ko Zientzia Asteak 63 jarduera eskaini ditu: 23 zientzia txoko, 27 lantegi, zazpi hitzaldi eta hiru erakusketa. Gainera, hiru lehiaketa egin dira.
EHUko ikertzaileek jarduerak sareko formatura egokitzeko lana eta pandemia egoeran ere zientzia dibulgatzen jarraitzeko egindako ahalegina nabarmendu dituzte ekimenaren arduradunek.
Bestalde, urriaren 13tik azaroaren 1era, 'UPV/EHU gure inguruan' ekitaldia egin zen Bilboko Bizkaia Aretoan, Zientzia Astearen sarrera modura, Nrbioi itsasadarra eta bere geografia herritarrei hurbiltzeko asmoz. Hainbat jarduera egin ziren, eta 1.200dik gora pertsonak parte hartu zuten.
Modu honetan, 2020ko Zientzia Astearen eta 'UPV/EHU Gure Ingurunean' aurretiko ekitaldiaren kopuruak batuta, "EHUk 6.838 pertsona hurbildu ditu zientziara eta ezagutzara".
Fernando Tapia EHUko Garapen Zientifiko eta Transferentziako errektoreordearen aburuz, "ikertzaileei eta EHUren Zientzia Astearen antolaketaz arduratzen diren pertsona guztien esfortzu handiari esker, denbora errekorrean, eskaintza erakargarria prestatzea posible izan da".
"Gainera, bizi dugun egoera soziosanitario korapilatsua honetan parte hartze datuek erakusten duten moduan, oso harrera ona izan du publikoaren artean. Besterik gabe, espero dut Euskadiko izaera zientifikoa duten jardueren eskaintza kultural garrantzitsuena biltzen duen ekitaldiaren hurrengo edizioa testuinguru mesedegarriagoan antolatu ahal izatea", adierazi du.
