BILBO, 21 (EUROPA PRESS)
Eusko Jaurlaritzako Osasun Sailak eta Hezkuntza Sailak proiektu pilotu berri bat hasiko dute otsailaren 4an, 8 eta 11 urte bitarteko eskola ikasleak elikagai osasungarriak kontsumitzera bultzatzeko. Helburua motibatzea da, sarien sistema baten bidez, fruta, barazki eta arrain zuri gehiago kontsumitzen hasteko, etxean zein ikastetxean, harik eta beren dietan ohitura bilakatu arte.
Ekimena Gasteizko ikastetxe publiko batean garatuko da -catering zerbitzua dago-, bai eta Sopelako (Bizkaia) ikastetxe itundu batean ere -sukaldea dago-. Datozen hiletan, fruta, barazki eta arrain zuria kontsumitzen duten ikasleak puntuak gehitzen joango dira, eta tutorea puntu horiek idazten joango da, ekimenaren arduradunek azaldu dutenez.
Era berean, ikasleek etxean jaten duten fruta, barazki eta arrain zuriaren kopurua jaso beharko dute gurasoek. Erregistro hori tutoreari emango zaio eta hark kargura duen eskola ikasle bakoitzaren puntuak batuko ditu. Ezarritako helburuak betetzen dituztenek "ikasle osasuntsua" diploma jasoko dute. Aldi berean, ikasgela osoak "ikasgela osasuntsua" diploma jasoko du, baldin eta ikasleen %75ek diploma jasotzen badu.
Jon Darpón Osasun sailburuaren hitzetan, "garrantzitsua da ekintzak abian jartzea eta gure ohiturak haurtzarotik hobetzen saiatzeko metodo berriak probatzea. Elikadura lotuta dago diabetesaren, gaixotasun kardiobaskularren eta zenbait minbizi motaren garapenarekin. Hori dela eta, garrantzitsua da umeak heztea, elikadura ohitura onak har ditzaten, eta, horrela, jaten dutena babesteko faktore izan dadin eta ez gaitzak garatzeko arrisku faktore".
Umeek jaten dutena erregistratzeko inprimakia doan deskarga dezake edozein interesdunek, Eusko Jaurlaritzako Osasun Saileko web orriaren honako esteka honetan: www.euskadi.eus/informazioa/ikasle-osasuntsua/web01-a2segali/eu/
ELIKADURA OSASUNGARRIA
Proiektua Euskadiko Elikadura Osasungarrirako Ekimenak izeneko planean sartzen da; plana Osasun Sailak sustatu zuen iaz, elikaduraren bidez osasuna sustatzeko. 2018an, aurretiko proiektua egin zen eta helburua izan zen hamar ikastetxetako jangeletako menuak aldatzea eta elikagai osasungarriagoak sartzea.
Aurretiko proiektuaren emaitzak eta adingabeen onarpen maila aztertu ziren, eta, aurrerantzean, menuek arrain urdinaren bi espezie berri izango zituztela erabaki zen: antxoa eta berdela. Gainera, fruta eskainiko zaie astean lau egunetan, hiru egunetan izan beharrean, orain arte bezala. Premisa berriak eskola jangeletako hurrengo esleipen kontratuaren hezkuntzako baldintza agirietan sartzen joango dira; kontratua aurtengo irailean sartuko da indarrean.
Ikastetxeetan eta Euskadiko Elikadura Osasungarrirako Ekimenak planak jasotzen dituen beste eremu batzuetan sustatzen ari diren ekintza horiez gain, Osakidetzak eta Osasun Sailak aste honetan komunikazio arloko beste ekimen bat jarri dute martxan, euskal gizarte osoarentzat. Horrela, 41 informazio taula jarri dira euskal osasun sareko zentroetan eta ospitaleetan, programaren lelorekin: "Euskadiko Elikadura Osasungarrirako Ekimenak": "Aukeratu osasuntsu jatea. Zu irabazle!" . Helburua da gizarte osoan elikadura ohitura onak hartzea.
