GASTEIZ, 17 (EUROPA PRESS)
Eusko Jaurlaritzako Ekonomiaren Garapen, Jasangarritasun eta Ingurumen Sailak enpresa txiki eta ertainentzako (ETE) 2021eko laguntzen plana aurkeztu du asteazken honetan, Gasteizen. Planak 68 laguntza programa biltzen ditu eta 433 milioi euroko aurrekontua du. Laguntzen helburua da ekonomia suspertzea eta kalitatezko enplegua sortzea, arreta berezia eskainiz Euskal Autonomia Erkidegoaren (EAE) garapen jasangarriari.
Arantxa Tapia sailburuak eta Aitor Urzelai SPRI Taldeko zuzendari nagusiak aurkeztu dute dirulaguntzen katalogo osoa, eta otsailaren 24an (Teknologia, Berrikuntza eta Ekintzailetza), 25ean (Industria, Energia eta Ingurumena) eta 26an (Lehen sektorea eta landa garapena eta Itsasertza) egingo diren jardunaldiak iragarri dituzte.
Sarean egingo diren jardunaldiotan, enpresek laguntza ildo bakoitzaren xehetasunak ezagutu ahal izango dituzte, eta beren premietara hobekien egokitzen dena aurkitu.
Gogorarazi dutenez, covid-19aren pandemiak %9,5eko jaitsiera eragin du 2020an EAEko ekonomian, eta langabezia tasa %11,2ra iritsi da. Hori dela eta, Ekonomiaren Garapen Saila lanean ari da ekonomia suspertzen eta enplegua sortzen laguntzeko, gobernuaren helburuen jarraibideen arabera.
Bada, EAEko enpresa sarearen modernizazioa eta lehiakortasuna bultzatu nahi dute laguntzek, eta ETEek laguntza horietako asko jada ezagutzen dituzten arren, badira alderdi berritzaileak, adibidez: ikerketarako ekipamendua eskuratzeko eta eguneratzeko Azpitek laguntza berriak; 'reshoring' eta dibertsifikazio programa berriak; nazioartekotzeko bekak berraktibatzea eta handitzea; tokiko produktua garatzeko eta bultzatzeko laguntzak; edo klima aldaketari erantzuteko laguntzak.
I+G+B
Helburuetako bat pandemiaren ondorioak jasaten ari diren enpresei laguntzea bada ere, laguntzen funtzio nagusia da sortzen ari diren aukera berriak baliatzeko gai diren proiektuak bultzatzea. Hartara, 433 milioi euro baino gehiagotik, laguntzetarako aurrekontuaren %40 I+G+B programetara bideratuko da.
Gainera, eraldaketa digitaleko, ekintzailetzako, industria garapeneko, nazioartekotzeko, ekonomia zirkularreko, trantsizio energetikoko edo elikagaien industriako proiektuak ere lagundu nahi dira, besteak beste.
Laguntza programez gain, Jaurlaritzak urteko informazio katalogo berrian sartu ditu funtsen bi lerro eta beste zerbitzu batzuk, Euskadiko enpresa txiki eta ertainen garapenean eta lehiakortasunean ere laguntzen dutenak.
Ekonomiaren Garapen, Jasangarritasun eta Ingurumen Sailak koordinatuta, sozietate publiko guztiak (SPRI, EEE, Ihobe, URA, Hazi eta Elika) elkarrekin lan egiten ari dira laguntzei buruzko informazioa EAEko enpresa guztietara hel dadin eta, hartara, laguntzak eskuratu ahal izan ditzaten.
