BILBO, 17 (EUROPA PRESS)
Euskaltzaindiak 19 hizlari bilduko ditu ostegunean eta ostiralean, urtarrilaren 17an eta 18an, Iruñeko Baluarte jauregian, "Hizkuntza gutxiagotuak jagon, euskaraz bizi - XXIII. Jagon jardunaldia" nazioarteko biltzarrean parte hartzeko. Baionako solasaldiaren eta Arantzazuko nazioarteko biltzarraren ondoren, mendeurrenaren baitan Akademiak antolatuko duen hirugarren jardunaldi akademikoa izango da.
Hasiera ekitaldian izan dira, Euskaltzaindiko arduradunekin batera, Uxue Barkos Nafarroako Gobernuko lehendakaria, Ainhoa Aznarez Nafarroako Parlamentuko presidentea eta Joseba Asiron Iruñeko alkatea.
Nazioarteko adituen artean, besteak beste, ondokoek parte hartuko dute: Cor van der Meer (Frisieraren Akademia), Elena Chiocchetti (Institute for Applied Linguistics), Jean-Guy Talamoni (Korsikako Parlamentuko presidentea), Henrique Monteagudo (Galizieraren Errege Akademia), Joan Argenter (Institut d'Estudis Catalans), edo Sixto Molina (Eskualdeetako edo Eremu Urriko Hizkuntzen Europako Kartaren idazkari eragilea).
Gainera, Euskaltzaindiak Jagon sailari ekingo dio Iruñean, bertara bilduko baitira hiru osagai nagusi jorratzeko. Hain zuzen, batetik, Euskaltzaindiak historian zehar egin duen euskararen normalizaziorako ibilbidea aztertuko da, Jagon sailaren eskutik, eta, bestetik, nazioarte mailan eta Euskal Herrian egun indarrean dauden araudiak eta esperientziak partekatuko dituzte, hizkuntza gutxiagotuen inguruko sarea ehunduz.
Halaber, Akademiaren barruan Jagon saileko Sustapen batzordearen lana bizkortu nahi dute, Euskaltzaindiak arlo honetan egin dituen ekarpenak agertuz, eta "Euskaltzaindiaren Adierazpenak (1976-2018)" eta "Hizkuntza-zuzenbidea. Testu-bilduma euskaraz" argitaraldi berri eta elektronikoak aurkeztuko dituzte.
Bestalde, Euskaltzaindiak ahalegin berezia egingo du biltzarrean hizkuntza gutxiagotuen akademia desberdinen arteko elkarlana sustatzeko, eta ostiralean aipatutako akademien elkargunea sortuko da, aurrerantzean, kezka komunak lantzeko helburuz.
Azkenik, ostegunean, 19:30ean, "Hitzaldia euskal literatura zaharrari buruz Martuteneko kartzelan" irakurraldia eskainiko dute Bernardo Atxagak eta Jose Cruz Gurrutxagak, eta ostiralean, 20:00etan, "Mende berria kantuz" koru emanaldia Euskeria, Paz de Ziganda Helduen Abesbatza eta Lauko Quartet taldeek.
