BILBO, 24 (EUROPA PRESS)
Ertzaintzako agenteek 37 urteko gizonezko bat atxilotu zuten asteartean, Bermeon (Bizkaia), genero indarkeriako delitu bat egotzita, emazteari eraso egin ondoren. Biktima erasotzailearen adiskide baten bisitaz baliatu zen etxebizitzatik alde egiteko eta laguntza eskatzeko. Patruila batek handik laster atxilotu zuen tratu txarren emailea, eta polizia egoitzara eraman, Eusko Jaurlaritzako Segurtasun Sailak jakinarazi duenez.
Asteartean gertatu zen guztia, gaueko 22:25ean. Ordu horretan, biktima etxera itzuli zen arratsaldea adiskide batzuekin igaro ondoren, eta senarrak, haserre, non egon zen galdetu zion eta jotzen hasi zen. Biktimaren esanetan, bikotekideak ukabilkadak eman zizkion, eta garondotik helduta, burua sofaren kontra estutu zion arnasa hartzea eragotziz.
Erasotzailearen adiskide bat etxebizitzara bisitan joan zela baliatuz alde egin zuen emakumeak etxetik eta eskatu zion laguntza adiskide bati. Emakumearen kontakizuna entzun ondoren adiskideak poliziari eman zion gertatutakoaren berri.
Handik laster iritsi zen Bermeoko Udaltzaingoaren patruila bat bertara, eta bi emakumeekin harremanetan jarri zen. Biktima oso urduri zegoenez, udaltzainek anbulatoriora eraman zuten, eta kasuaz arduratu ziren Ertzaintzako agenteei emakumeak esan zien bikotekideak tratu txar psikologikoak ere ematen zizkiola.
Salaketa horren aurrean, ertzainek etxera eraman zuten biktima eta bere senarra atxilotu zuten, 37 urteko gizonezko bat, genero indarkeriako delitu bat egotzita. Atxilotua ertzain etxera eraman zuten dagozkion izapideak egitera, eta datozen orduotan eramango dute epailearen aurrera.
