BILBO, 26 (EUROPA PRESS)
Hi(ZKI)bridoak zikloa hasiko da ostegunean, otsailaren 27an, Bilbon dagoen Euskararen Etxean, Itxaro Borda idazleak eta Ibon RG musikariak ondutako 'Buztinezko Etorkizuna' ekitaldiarekin. Saioa arratsaldeko 19:30ean hasiko da, Azkue Fundazioak prentsa ohar bidez jakinarazi dutenez.
"Kolapsologoek aipatzen duten munduaren leherketa hurbila dauka ardatz Itxaro Bordaren idazkiak. Kutsadura, gaixotasunak, errepresio soziala, naturaren menderaketa osoa: gure altzairuzko, beirazko eta burdinezko planeta zati honen etorkizuna buztinezkoak baizik ez balitz funtsean? Idazlearen ahots apokaliptikoari sakontasuna ematen dio Ibon RG musikari ospetsuaren Korg sintetizadorearen auhen elektroniko kasik humanoak", azaldu dute.
Hi(ZKI)bridoak egitarauak literaturan eta ahozkotasunean ardaztutako zuzeneko bost ekitaldi eskainiko ditu, "literaturaren eta ahozkotasunaren arteko mutazioak, letrak, soinuak, bertsoak eta irudiak eraldatzen dituzten ekitaldiak, eta emaitza literatura mutanteak dira, zentzu zabalenean".
Osteguneko saioaren ondoren, martxoaren 25ean, Muga egitasmoa izango da protagonista Hi(ZKI)bridoak egitarauan, 'Anfetamiña' Xabier Montoiaren lehen liburuan oinarritutako eta Gaztelupeko Hotsak diskoetxeak argitaratutako; apirilaren 23an, bertso saio literarioa izango da, Mari Luz Esteban, Miren Amuriza eta Maialen Lujanbiorekin; maiatzaren 15ean, 'Habiak' Anariren izenburuko bereko lanean oinarritutako arte erakusketa irekiko da eta Anari taldeak 'Habiak' joko du zuzenean; azkenik, maiatzaren 28an, Txakur Gorria Sormen Kolektiboak 'Orainmenean' bertsolaritzaren genealogia feminista egingo du.
Euskararen Etxeak eta Bizkaiko Foru Aldundiko Euskara, Kirola eta Kultura Sailak antolatu dute egitasmoa, Booktegi, Loraldia eta Lanku erakundeekin lankidetzan.
