Irailean 3.367 langabe gutxiago izan dira EAEn eta denera 107.996 daude

BILBO, 2 (EUROPA PRESS)

Euskal Autonomia Erkidegoan (EAE) 3.367 langabe gutxiago zenbatetsi dira irailean, hau da, aurreko hilean %3,02 gutxiago baina 2023ko irailean 1.271 gehiago (+%1,19), eta guztira 107.996 daude, Lanbide Euskal Enplegu Zerbitzu Publikoan erregistratutako datuen arabera.

Sexuaren arabera, 62.983 emakumezko eta 45.013 gizonezko daude langabezian, hots, abuztuan baino 2.197 (-%3,37) eta 1.170 (-%2,53) gutxiago, eta 2023ko irailean baino 849 (+%1,37) eta 422 (+%0,95) gehiago, hurrenez hurren.

Adinari erreparatuta, 30 urtetik beherako 18.054 langabe daude, aurreko hilean baino 317 gutxiago (-%1,73) eta iazko irailean baino 795 gehiago (+%4,61). Era berean, 45 urtetik gorako langabeak 59.007 dira, abuztuan baino 763 gutxiago (-%1,28) eta duela urtebete baino 334 gehiago (+%0,57).

Sektoreka, langabezia guztietan jaitsi da irailean aurreko hilaren aldean, aurreko enplegurik gabeko kolektiboan izan ezik, 114 gehiago izan baitira (+%0,83), eta denera 13.832 daude. Horrela, zerbitzuetan 76.157 langabe daude, 3.111 gutxiago (-%3,92), industrian 10.327, 181 gutxiago (-%1,72), eraikuntzan 5.898, 103 gutxiago (-%1,72), eta nekazaritza eta arrantzan 1.782, 86 gutxiago (-%4,60).

Era berean, 2023ko irailarekin alderatuta, langabezia industrian eta eraikuntzan gutxitu da, 127 (-%1,21) eta 249 (-%4,05) langabe gutxiagorekin hurrenez hurren, eta gainerako sektoreetan igo egin da: zerbitzuetan 1.033 langabe gehiago (+%1,38), aurreko enplegurik gabeko kolekiboan 612 gehiago (+%4,63) eta nekazaritza eta arrantzan 2 gehiago (+%0,11).

Lurralde historikoka, Araban 18.152 langabe daude, abuztuan baino 338 gutxiago (-%1,83) eta 2023ko irailean baino 772 gutxiago (-%4,08); Bizkaian 61.379 langabe zenbatetsi dira irailean, aurreko hilean baino 1.616 gutxiago (-%2,57) eta iaz baino 1.483 gehiago (+%2,48), eta Gipuzkoan 28.465, abuztuan baino 1.413 gutxiago (-%4,73) eta duela urtebete baino 560 gehiago (+%2,01).

Azkenik, kontratazioari dagokionez, irailean 74.413 kontratu berri sinatu dira Araban, Bizkaian eta Gipuzkoan, eta horietatik 19.097 mugagabeak izan dira, hau da, guztizkoaren %25,66.